کراچی۔ 24 اگست (اے پی پی) نگراں وزیراعلیٰ سندھ جسٹس (ر) مقبول باقر صوبہ ٹی زند ءِ بچفوک آ دوائی تا کمتی آ ترندی نا درشانی ءِ کرینے۔ پنچ شنبے نادے آ جاری اعلامیہ نا رداٹ نگراں وزیراعلیٰ سندھ ہسپتال ومارکیٹ آتیٹی بے آب اٹ دوائی تا بہاکننگ آ کارروائی نا پرمان کرینے۔ اوصوبائی وزیر جان جوڑی ڈاکٹر سعد خالد نیاز ءِ ٹیل فون کرے۔ اومحکمہ جان جوڑی ءِ غٹ سرکاری ہسپتال آتیٹی آب اٹ دوائی تا فراوانی ءِ پک کننگ نا پارت کرسا زند ءِ بچفوک آ دوائی تا کمتی آ رپورٹ بٹنگا۔ اوپارے کہ ہسپتال و مارکیٹ آتیٹی دوائی تا کمتی نا سوب کوڑی کننگ ءِ ، یا پین سوب اسے۔ محکمہ جان جوڑی جعلی دوائی تا بہاکننگ نا برخلاف تعلقدار زموار آتا برخلاف سخت کارروائی کے۔ نگراں وزیراعلیٰ سندھ پارےکہ انسانی زند اتون گوازی کروک آ زموار آتے بشخپنہ ، محکمہ جان جوڑی نا تعلقدار آفیسر آک میڈیسن مارکیٹ آتیٹی انسپیکشن ءِ پک کیر۔ نگراں وزیراعلیٰ سندھ صوبائی وزیر جان جوڑی ءِ ڈینگی و ملیریا پروگرام ءِ پین فعال کننگ نا پارت کرے۔ جسٹس (ر) مقبول باقر پارے کہ ڈینگی و ملیریا نا توننگ کن پین گام گیج کننگے، غٹ بلدیاتی ادارہ غاک تینا تعلقدار علاقہ غاتیٹی مچھرمار اسپرے المی کرفر۔
