اسلام آباد۔ 24 اگست (اے پی پی) نگراں بنجائی وزیر تعلیم و کسبی تربیت مدد علی سندھی پارینے کہ قومی شونہالی ورناتے غٹ المی مہارت آتیان آراستہ کننگ اٹی ءِ، ملک اٹی کسبکاری نا تعلیم نا مون آ دننگ اٹ نیشنل سکلز یونیورسٹی اسلام آباد نا کڑد سفت نا قابل ءِ۔ داخیال آتا درشانی ءِ او پنچ شنبے نادے آ یونیورسٹی نا وائس چانسلر تون بنائی میٹنگ اٹی گپ وتران کرسا کرے۔ بنجائی وزیر تعلیم کسبکاری نا تعلیم کن نیشنل سکلز یونیورسٹی اسلام آباد نا ستاءِ کرے۔ اوپارے کہ ننے مچ آ ملک انا الس ءِ روزگار کننگ نالائخی تا تعلیم تننگ نا گرج ءِ۔ قومی شونہالی نا گڈیکو ایسر ورناتے دا غٹ المی مہارت آتیان آراستہ کننگ اٹی ءِ ہرا تہہ و پیشن ملک انا آجر پٹرہ۔ او پارے کہ اہم ہیت دادے کہ مچ آ ملک اٹی نیشنل اسکلز یونیورسٹی اسلام آباد نا تیار کروک کسب نا تعلیم نا ماڈل ءِ لاگو کننگ نا گرج ءِ ۔ خاص وڑاٹ، خلقی سندھ و ایلو صوبہ غاتا مر مر انگا علاقہ غاتے بھاز فائدہ مننگ کیک۔ اگہ نیشنل اسکلز یونیورسٹی نا تعلیمی حکمت عملی ءِ نافذ کننگے تو کسبکاری نا تعلیم اسکان رسینگ اٹ ودکی کننگ مریک۔ داوخت آ وائس چانسلر پروفیسر ڈاکٹر محمد مختار بنائی میٹنگ اٹی پروچانسلر نا وژن نا ستا ءِ کرے۔حوالی سیشن اٹی وزیر تعلیم یونیورسٹی نا کنڈآن پیش کروک چندی کسبکاری ہیل تروک آ پروگرام تیٹی بھاز است خواہی ہلک و تینا عملہ ءِ مشورہ تس کہ او نیشنل اسکلز یونیورسٹی اسلام آباد نا دورہ نا بست وبند ءِ کیر۔ داکان بیدس نگراں بنجائی وزیر تعلیم ءِ ملک اٹ کسب نا تعلیم کن یونیسکو/یواین ای وی او سی سینٹر نا وڑاٹ این ایس یو کے یکتا جہانی اعزاز بارواٹی معلومدار کننگا۔ پروفیسر مختار پارے کہ پروچانسلر نا علمی بصیرت، خلقی علاقہ غاتا ورناتا ویل انا درک و گچین شخصیت قومی تعلیمی نظام ءِ مون آ دننگ اٹ بے حد فائدہ ئی مریک ۔
