کوئٹہ۔ 24 اگست (اے پی پی) بلوچستان نا معدنی بشخ اٹی زوت ارب آ ڈالر نا زرکاری گمانی ءِ ، سنگت ملک آتون زرکاری نا پین معاہدہ غاتے گڈیکو دروشم اس تننگ انگ ءِ۔ داہیت ءِ نگراں وزیراعلیٰ بلوچستان میر علی مردان خان ڈومکی نا کماشی ٹی محکمہ معدنیات و معدنی شونداری نا محکمانہ امور نا جاچ دیوان اٹی پاننگا۔ نگراں وزیراعلیٰ ءِ معاہدہ غاتا سرجم آتیان ہم معلومدار کننگا۔ نگراں وزیراعلیٰ زرکاری نا مون آ دننگ ءِ اہم پیش رفت اس گوندا۔ دیوان اٹ نگراں سلاہکار معدنیات میر عمیر محمدحسنی، چیف سیکرٹری بلوچستان شکیل قادر خان، شعبہ معدنیات نا شونداری کن جوڑ کمپنی بی ایم ای سی و بی ایم آر ایل نا منیجنگ ڈائریکٹر و ایلو تعلقدار کمامدار آک ہم دیوان اٹی ساڑی ئسر۔ سیکرٹری محکمہ معدنیات سیدال خان لونی دیوان ءِ حوال تس۔ داوخت آ وزیراعلیٰ نا پاننگ ئس کہ بلوچستان نا نہادی معدنیات ملک و صوبہ نا زرگزرانی آخبت نا ضامن ءُ و معدنی بشخ اٹی زرکاری ٹی ودکی کن گچین حکمت عملی اس تینا کننگ نا گرج ءِ۔ مچ آ دنیا نا خنک بلوچستان نا وسیلہ غاتیاٹی ءُ، ہراڑے ریکوڈک آنبار پین معدنی کوڑی ہم ارے ہرافتے دنیا نا مون آ اتنگ نا گرج ءِ، زرکار آتے سازگار چاگڑد اس ترسا اوفتا پت ءِ سوگو کروئی مریک۔ اوپارے کہ ریکوڈک معاہدہ غان پین زرکارہم بلوچستان نا کنڈا چکار کننگ ءُ۔ اوپارے کہ سیندک معاہدہ ٹی پین گچینی نا گنجائشت ارے ہرانا فائدہ بلوچستان ءِ رسینگے، وخت اس کہ معدنی معاہدہ غاتا بھرم تے ہندی آبادی اسکان سرمفننگ نا تاثر ءِ ہم مر کننگ مرے۔ اوپارت کرے کہ معدنیات نا پٹنگ و شونداری نا پک ڈیٹا نا دوئی کننگ کن چاہندار آتا خذمت ءِ ہلنگے و محکمہ معدنیات ءِ سٹریکچرل ریفارمز نا کمک اٹ ساڑی آ دور اناپوسکن آ خواست آتون ہم گرنچ کننگے۔
