کراچی۔ 23 اگست (اے پی پی) نگراں وزیراعظم انوارالحق کاکڑ پارینے کہ ملکی شونداری کن یکجا مرسا کوشست کروئی مریک ، زرگزرانی شونداری ٹی پوریاگر آتا اہم ءُ کڑد اسے، پوریاگر آتا ویل آتے ایسر کننگ کن ہرممکن گام گیج کینہ، انصاف اٹ و شفاف گچین کاری تیکن سنبرینگوک اُن۔ داخیال آتا درشانی ءِ نگراں وزیراعظم انوارالحق کاکڑ چارشنبے نادے آ کراچی ٹی پنی آ کاروباری شخصیت آتیان تران کرسا کرے۔ نگراں وزیراعظم پارے کہ اللہ تعالیٰ انسان ءِ وخت کون آ نعمت تسنے، اسہ ایلو کن وخت کشنگ غٹ آن قیمتی ءِ، پوریاگر برادری زرگزرانی شونداری ٹی تمبہ نا حیثیت تخک اوفتا سوب آن کارہائے روزگار چلینگ انگ ءِ۔ اوپارے کہ پوریاگر برادری رز ق حلال کٹک، پوریاگر کٹرہ، خراج ایترہ ، دا خراج محروم تپہ غاتا راجی آسودہی آ خڑچ کننگک۔ نگراں وزیراعظم پارے کہ دا راجی خذمت ءِ ہرا حکومت نا ہم مسخت و نصب العین ءِ، بجلی و گیس انا ویل یقینا اریر و اوفتے تینا وسیلہ غاتا رداٹ ایسر کینہ۔ انوارالحق کاکڑ پارے کہ ننا مینڈیٹ بھاز محدود ءِ، ننے گچین کاری تا اڈتننگ اٹ کمک فراوان کروئی ءِ و ہڑدے ئی امور تے چلیفوئی ءِ، قومی و جہانی معاہدہ غاتا پاسداری ءِ کروئی ءِ، آئینی و کانودی امور نا چرجوئی ءِ برجا تخسا پوسکن آ جمہوری حکومت نا قیام اسکان تینا زمواری تے پورو کینہ تانکہ نظام اٹ ہچ ءُ اڑاند اس ودی مف و انتقال اقتدار نا ریسہ جوانی اٹ پورو مرے۔ اوپارے کہ دنیا ٹی پرامن انتقال اقتدار نا اصول طے ءِ و نن دا غٹ آ عمل کننگ اُن، کراچی و داجاگہ نا پوریاگربرادری ملک انا شان ءُ، کراچی نا پوریاگر برادری ناملکی زرگزران اٹ اہم کڑد اسے، نن راجی خذمت آتیٹی تینا کڑد ءِ ادا کین۔ خراج دُزی نا بابت نیمہ سچ مون آ بریک خراج نا سہی تقسیم مفک۔ نگراں وزیراعظم پارے کہ گورننس بھلو ویل اسے، اڑزان بجلی نا فراوانی ءِ پک کننگپک تو ملک اٹی صنعت آک امر مون آ کارہ۔ ملک اٹی ہر بشخ آن تعلق تخوک آ بندغ آک تعمیرات آ چکار کرینو، ملکی کہول آ ودی مروک آ گیس صنعت آتیٹی کاریم اٹ اتسا زرگزران ءِ سوگو کننگ مفک ، خور و خذمت آتا بشخ آتیٹی چیلنج مون تروک ءِ۔ انوارالحق کاکڑ پارے کہ ای باوری کرفیوہ کہ نن اواری اٹ مثبت بدلی اتینہ، ننے اسہ ایلو نا خف توروئی مریک ، ملک انا جم زرگزرانی شونداری نا سفر یکجا مرسا ایسر اسکان سرکننگ مریک۔ پاکستان خاص وڑاٹ بلوچستان قدرتی نعمت آتیان شپ ءِ، ملک ءِ خور انا کمتی نا مون تروک و مخلوق مایوسی نا گواچی ءُ، سوج دادے کہ نن ہر گڑاءِ منفی وڑاٹ انت اکن ہلینہ۔
