کراچی۔ 23 اگست (اے پی پی) نگراں وزیراعظم انوارالحق کاکڑ پارینے کہ پاک فوج، ضلعی انتطامیہ و ہندی بندغ آک بٹگرام اٹی چیئرلفٹ اٹ اختہ مروک چناتے اواری اٹ ریسکیو کریر، ہروڑنا ناگہانی حالیت آتون مون تننگ کن ادارہ غاتا کاریم نا کچ اٹی پین ودکی کروئی مریک، ملک آن انتہاپسندی و دہشت گردی نا ناسور ءِ ماس کش کینہ، تینا شہید آتا قربانی تے اسُل است آن دپنہ۔ داخیال آتا درشانی ءِ او چارشنبے نادے آ میڈیا تون گپ وتران کرسا کرے۔ وزیراعظم پارے کہ پاک فوج، ضلعی انتظامیہ و ہندی بندغ آک اوار ی اٹ اختہ مروک آ چناتے ریسکیو کریر، اسکول نا چناک ہرانرزوری نا درشانی ءِ کریر او ستاکڑزک، بٹگرام چیئرلفٹ آپریشن نا سرسہبی آ بھاز خوشی مس۔ اوپارے کہ این ڈی ایم اے و پی ڈی ایم اے نا کاریم نا کچ اٹی پین گچینی اتنگ نا گرج ءِ، پاک فوج انا ریسکیو آپریشن ننا کاٹم ءِ فخر اٹ بڑز اکرے،دا چناتے ریسکیو کننگ اصل ویل ئسک، سوشل میڈیا غا دا باندات ءِ غلط رنگ اس تننگ نا کوشست کننگا۔ اوپارے کہ تدوک آ دے پاک فوج انا ورنا شہید مس، پاکستان ہچ ءُ حالیت اسے ٹی دہشت گردی، انتہاپسندی و بے سگی نا برخلاف سرنڈر کپک، نن دانا ہرحال اٹ مقابلہ ءِ کینہ، نن تینا اُرا ءِ تینا وڑاٹ چلیفینہ، کس اسےغلط فہمی ارے کہ داوڑنا حرکت آتیان ننا حوصلہ پست مریک، او تینا غلط فہمی ءِ مرکے، نن تینا شہید آتے است آن دپنہ و نئے اوفتا حرمت و قربانی تے است آ دینہ و آخبت اٹ ہم ہروڑنا قربانی ایتنہ۔ اوپارے کہ کودک مخلوق نا جان تے ہلنگ نا ہچ ءُ حالیت اسے ٹی موکل تننگ مفک، اگہ کس اس داوڑنا ناپاک حرکت کیک تو اودے پبی ورندی ملک۔ داوخت آ گورنر سندھ کامران ٹیسوری و نگراں بنجائی وزیر حوالکاری و شینکاری مرتضیٰ سولنگی ئسک ہم ساڑی ئسر۔
