ننا ہچ گہس سیاسی دوست و سیاسی دشمن اف، ہر سیاسی جماعت ءِ تینا خیال آتا درشانی ءِ کننگ نا آجوئی دوئی ءِ، مرتضیٰ سولنگی

اسلام آباد۔ 23 اگست (اے پی پی) نگراں بنجائی وزیر حوالکاری و شینکاری مرتضیٰ سولنگی پارینے کہ ننا ہچ گہس سیاسی دوست و سیاسی دشمن اف، ہر سیاسی جماعت ءِ تینا خیال آتا درشانی ءِ کننگ نا آجوئی دوئی ءِ۔ تنقید اوفتا جمہوری حق ءِ ، نن دا حق ءِ اوفتیان ہلنگ کپنہ۔ چارشنبے نادے آ نجی ٹی وی چینل اسے نا پروگرام اٹی گپ وتران کرسا نگراں بنجائی وزیر حوالکاری پارے کہ نن اسہ ہم سیاسی جماعت اسے نا حق اٹی و مخالف افن، ملک انا آئین و کانود نا رداٹ چلینگوک آ ہرکارروائی ٹی نن ہچ ءُ نیام تمنگ اسے نا ارادہ تخپنہ، اگہ کس اسے نابرخلاف آئین، کانود و عدالت آک گام اس ہرفرہ نن  او عمل ءِ توننگ کپنہ۔ گچین کاری تا بابت سوج آ نگراں بنجائی وزیر حوالکاری پارے کہ الیکشن کمیشن آئینی ادارہ ءِ ، ساف ، شفاف ، بے کنڈ ہلوک و آجو گچین کاری تا اڈتننگ الیکشن کمیشن نا زمواری ءِ ۔ اوپارے کہ نن تینا سوغند نا پاسداری ءِ کینہ ، سوغند نا خلاف ورزی نا سجفنگ کپنہ، نن تون نااومیتی نا ہچ ءُ خبر و وعدہ خلافی نا ہچ ءُ شائبہ اس اف۔ اوپارے کہ الیکشن کمیشن تینا ویب سائٹ آ مچ آ شیڈول ءِ جاری کرینے، الیکشن ایکٹ نا رداٹ سیاسی جماعت آتے مہم کن 54 دے تروئی تمک۔ اوپارے کہ پاکستان اسہ جمہوری ملک اسے۔ مخلوق ءِ آجوئی سلاہ نا آجوئی دوئی ءِ۔ اوپارے کہ ننازمواری ءِ کہ نن حکومتی امور تے گچین کین۔ صدر مملکت نا ٹویٹ نا بابت اوپارے کہ صدر مملکت ہرادے آ ٹویٹ کرے ہمودے آ نن کانودی پوزیشن ء، پیدوار کریسن۔