اسلام آباد۔ 22 اگست (اے پی پی) بنجائی کابینہ بین المذاہب ہم آہنگی نا مون آ دننگ کن بروک آ ہفتہ قومی کہول آ بین المذاہب ہم آہنگی کانفرنس اس اڈتننگ نا پارت کرینے وخت اس کہ نگراں وزیراعظم انوارالحق کاکڑ پارینے کہ ملک اٹی انتہاپسندی و مذہبی بے چیٹی نا اسُل موکل تفننگک۔ پاکستان اٹ ساڑی اقلیت آتا رکھ ریاست نا اولی فرض انا بشخ ءِ۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ نگراں وزیراعظم انوارالحق کاکڑ نا کماشی ٹی عبوری بنجائی کابینہ نا دیوان مس۔ دیوان اٹی وزیراعظم بنجائی کابینہ ءِ تینا جڑانوالہ دورہ غان معلومدار کرے۔ وزیراعظم پارے کہ پاکستان اٹ ساڑی اقلیت آتا رکھ ریاست نا فرض ءِ۔ ملک اٹی انتہاپسندی و مذہبی بے چیٹی تا اسُل موکل تفننگک۔ اوپارے کہ جڑانوالہ نا واقعہ ٹی اوار بندغ آتا قرار واقعی سزا ءِ پک کننگک۔ کابینہ بروک آ ہفتہ قومی کہول آ بین المذاہب ہم آہنگی کانفرنس اس اڈتننگ نا پارت کرے ہراٹی چندی مذہب آتا راہشون و چندی مکتبہ فکر انا عالم دین تے بٹنگ انگک۔ کانفرنس پاکستان اٹ بین المذاہب ہم آہنگی نا مون آ دننگ کن مزل نا نشان مریک۔ بنجائی کابینہ وزارت خزانہ ناسفارش آ مالی سال 2023-24کن دیت نا زر ہراکہ 30،630 گرام چاندی نا بریبرمریک ءِ 67 لکھ 57 ہزار 902 روپئی مقرر کرینے۔
