اسلام آباد۔ 22 اگست (اے پی پی) اسپیکر قومی اسمبلی راجہ پرویز اشرف سویلی وزیرستان اٹی دہشت گرد آتا برخلاف آپریشن اٹی سیکورٹی فورس آتا 6 ورناتا جونی نسخان آ ڈکھیائی وا ست ہسونی نا درشانی ءِ کرینے۔ سے شنبے نادے آ تینا بیان اٹی اونرزوری اتون دہشت گرد آتا مقابلہ ءِ کننگ آ شہید ورناتے خراج عقیدت پیش کرے و پارے کہ سیکورٹی فورس آک دہشت گردی نا برخلاف جنگ اتون مون تننگ ءُ۔ مچ آ قوم ءِ تینا نرزورورناتیا گمر ءِ۔ اسپیکر قومی اسمبلی شہید آتا خاہوت تون دلی ہمدردی و ہڑزخواہی نا درشانی ءِ کرے و پارے کہ ملک دشمن زموار آک تینا ناپاک مسخت آتا کمک اٹ دہشت گردی نا برخلاف سیکورٹی فورس آتا غیر متزلزل عزم ءِ متزلزل کننگ کپسہ۔ مچ آ قوم دہشت گرد آتا بیخ کنی کن تینا سیکورٹی فورس آتون ہم کوپہ سلوک ءُ۔ ملک اٹی دہشت گردی نا برخلاف جنگ اٹی سلہہ بند فوج انا قربانیک زیان مفسہ۔ قوم دہشت گردی نا برخلاف جنگ اٹ تینا سیکورٹی فورس آتا قربانی تے اسُل است آن دپک۔ اوپارے کہ دہشت گرد آتا برخلاف جنگ اٹی سیکورٹی آ سلوک ورناک ننا حقی ہیروک ءُ۔ اسپیکر قومی اسمبلی اللہ تعالیٰ آن شہید آتا درجہ غاتا بڑزی و پدسلوک آ خاہوت ءِ دا بے بدل نسخان ءِ سگنگ کن صبر وجمیل عطاکننگ نا دعاکرے۔
