اسلام آباد۔ 21 اگست (اے پی پی) اسپیکر قومی اسمبلی راجہ پرویز اشرف پارینے کہ قوم اسے نا حالیت ہمووخت اسکان بدل مفک ہراتم اسکان اودے تینٹ تینا حالیت ءِ بدل کننگ نا فکر مف،بروک آ لس گچین کاری تیٹی گوجر خان نا الس نا فیصلہ شونداری و شونہالی نا فیصلہ مریک، الس ءِ گچین کاری تیٹی داہیت انا خیال ءِ تخوئی مریک کہ حقی وڑاٹی الس نا خذمت ءِ دیر اس کرینے۔ داخیال آتا درشانی ءِ او یونین کونسل کری دولال نا خلق کریالی ٹی بھلو السی مچی اسے آن تران کرسا کرے۔ اسپیکر قومی اسمبلی تون اوار خرم پرویز راجہ ہم ساڑی ئسک۔ داوخت آ راجہ عبدالغفار ، راجہ اشتیاق، راجہ ظفر ، اسرار قریشی، مقصود قریشی، مظہر، اسلم، فاروق، بشارت خان و ایلوفک اسپیکر قومی اسمبلی راجہ پرویز اشرف و پی پی پی نا کماش آتیا پورو پت انا درشانی ءِ کرسا مسلم لیگ ن و پاکستان تحریک انصاف ءِ اِلسا پاکستان پیپلزپارٹی ٹی اوار مننگ نا باقاعدہ پڑو ءِ کریر۔ اسپیکر راجہ پرویز اشرف مچی ٹی بشخ ہلوک آتیان تران کرسا پارے کہ گوجر خان نا الس تون کنا بھاز بھلو رشتہ اسے۔ ای داہیت آن جوانی اٹ بلداُٹ کہ کنا طاقت نا سرچشمہ الس ءِ، ای گوجرخان نا الس تون ہرا قول آتے کریسٹ اوفتے پورو کننگ کن ساڑی آ غٹ وسیلہ غاتے کاریم اٹ اتنگانے۔ گوجر خان نا خلق خلق اٹی بجلی تننگ کنا اولی مشن ئسک، گودی بینطیر بھٹو 1993ٹی کنے تینا کنڈآن 122 خلق آتیکن بجلی تس، ای ہراتم الس تون بجلی و گیس انا قول کریٹ تو کنا مخالف آک کنے آ ملنڈ خلکر۔ مخالف آک داہم پاریر کہ تحصیل اٹ پاس پورٹ آفس جوڑ مننگ کپک ولے ای جوڑ کرسا تسٹ۔ راجہ پرویز اشرف پارے کہ ای گوجر خان نا الس نا کیس اتون بھاز جوانی اٹ مون تسونٹ، ہراڑے الس نا لیڈر نزور مریک ہموجاگہ نا الس پسماندہ سلک۔ کنا درجہ الس کن مدام ملوک ءِ۔ گوجر خان نا الس تون قول کیوہ کہ نما پت ءِ اسُل ٹھیس تفرہ۔ قوم اسے نا حالیت ہمووخت اسکان بدل مفک ہراتم اسکان اودے تینٹ تینا حالیت ءِ بدل کننگ نا فکر مف۔ بروک آ گچین کاری تیٹی گوجر خان نا الس نا فیصلہ شونداری وشونہالی نا فیصلہ مریک۔
