اسلام آباد۔ 18 اگست (اے پی پی) نگران وزیراعظم انوارالحق کاکڑ پارینے کہ کانود نا حکمرانی آ ہچ ءُ سمجھوتہ اس کننگپک ، پاکستان قدرتی وسلہ غاتیان شپ ءُ ملک اسے، پیشن نا زرکاری سہولت کونسل نا پلیٹ فارم آن مقررہ مد اٹی پاکستان نا شونداری نا بنداو ءِ تخنگ نا کوشست ءِ کینہ، ملکی و درملکی کہول آ کروک آ قول آتے پورو کینہ، کشمیر اسہ متکن ءُ جھیڑہ اسے و اودے ہچ ءُ حالیت اسے ٹی گوجالنگ مفک، ریاست اقلیت آتے نسخان تروک آتون اف، گیشتری ءِ اقلیت ناخیال ءِ تخوئی مریک۔ جمعہ نادے آ کابینہ دیوان اٹی گپ وتران کرسا نگران وزیراعظم انوارالحق کاکڑ پوسکن آ نگراں کابینہ ءِ مبارکبادی ترسا پارے کہ دااسہ آزموندہ کار و گچین ءُ ٹیم اسے۔ کابینہ ٹی ملک انا قابل آ بندغ آک اوار ءُ و تینا تینا بشخ آتیٹی مہارت تخرہ۔ نگراں وزیراعظم پارے کہ ای قابل ٹیم آ گمر کیوہ و اومیتءِ کہ دا عبوری مد اٹی نن قوم انا پبی خذمت ءِ کینہ۔ گوکہ ننتون ملک انا خذمت کن زیات ءُ مینڈیٹ اس اف بلکن اسہ چنکو وخت اسے، نن کوشت کینہ کہ تدوک آ حکومت آک ملکی و جہانی کہول آ چندی فورم تیا ہراقول آتے کرینو اوفتے کورو کین و ہنداچرجوئی ٹی کانود وآئین نن ہراموکل ایتک اوٹی رہینگسا پوسکن ءُ گام گیج کین، خاص وڑاٹ تدوک آحکومت نا کنڈآن جوڑ کروک آ درملکی زرکاری سہولت کونسل نا پلیٹ فارم آن ہرااومیت آتے وابستہ کننگانے اوفتا پوروی مرے۔ اوپارے کہ پاکستان اسہ کشاری ءُ ملک اسے ، ہراڑے بھلو معدنی وسیلہ ارے۔ بلوچستان قدرتی و معدنی وسیلہ غاتیان شُپ ءِ۔ اوپارے کہ ایس آئی ایف سی پوسکن ءُ تصور اس اف بلکن دا متکن آ قومی تغ ءِ ہراڑا داسہ عملدرآمد کننگ انگ ءِ۔ وخت بسنے کہ پاک آرمی تون اوار غٹ ادارہ غاتا کمک اٹ نن کمکاری، آسراتی ، حوصلہ و درک اٹ دامتکن آ قومی تغ ءِ پورو کین۔ دااسہ ادارہ سے نا آخا بلکن 25 کروڑ الس نا اجتماعی ملکیت ءِ۔ داٹی نن غٹ اسیجائی وڑٹ کڑد ادا کینہ۔ اوپارے کہ دا منقسم چاگڑد اٹ نن کوشست کینہ کہ سیاست و کانود اٹی پرخ تخن۔ داڑے کانود نا حکمرانی و رول آف آرڈرمرے۔ نن پک کینہ کہ رول آف آرڈر آ ہچ ءُ وڑاسے ٹی سمجھوتہ مف، اگہ ہراڑے کہ بے چیٹی اس مرے تو ہچ ءُ حکومتی نظام اس چلینگ کپک، نن دانااہمیت آن معلومدار اُن۔ داڑا ہچ ءُ وڑاسے ٹی سمجھوتہ مننگ کپک۔ اوپارے کہ پاکستان غٹ مذہب آتا حامل مخلوق نا ملک ءِ۔ قائد اعظم 11 اگست آ تینا پنی آ تقریر اٹی پاریسس کہ اسٹ اسے ہم اونا شناخت نا بنداو آ حق دوئی مفک بلکن بے پرخ غٹ ءِ دا حق مریک ۔ ننے تینا پاکستان نا تغ انا درک ءِ کروئی مریک و داننا دھرتی نا تغ ءِ۔ قائد اعظم و اقبال نا وژن آ عمل کرسا پاکستان نا شونداری ٹی کڑد ادا کینہ۔ اوپارے کہ نن قدامت پسند رجحان تا ہر دروشم نا سختی اٹ مذمت ءِ کینہ۔ راج اٹ مذہبی انتہاپسندی نا ہچ ءُ گنجائشت اس اف۔ اونا حوصلہ شکنی ءِ کننگک۔ قدامت پسندی خواہ مذہبی مرے یا سیکولر یا پین دروشم اسے ٹی مرے اونا ستاءِ کننگ مفک بلکن اونا حوصلہ شکنی ءِ کروئی ءِ۔
