اسلام آباد۔ 18 اگست (اے پی پی) ڈاکٹر ندیم جان نگران بنجائی وزیرجان جوڑی نا حیثیت اٹ تینا وزارت نا قلمدان ءِ سنبھالانے۔ جمعہ نادے آ ترجمان وزارت جان جوڑی نا کنڈآن جاری بیان نا رداٹ بنجائی سیکرٹری جان جوڑی افتخار علی شلوانی و سٹاف وزیر جان جوڑی ءِ بخیر اٹ پاریر۔ ڈاکٹر ندیم جان جان جوڑی نا بشخ اٹی شاندار خذمت آتا اعتراف اٹی ستارہ امتیاز دوئی کرینے۔ او پاکستان اٹ پولیو نا چٹفنگ کن تینا خذمت آتا سوب آن جہانی شہرت تخک۔ چارج ءِ سنبھالنگ آن پد وزارت نا آفیسر و ہیڈ آف ڈیپارٹمنٹ تون درستی راستی اوڑدہی اس ہم کرے۔ داوخت آ بنجائی سیکرٹری جان جوڑی افتخار شلوانی، ایڈیشنل سیکرٹری کامران رحمان خان، ڈی جی ہیلتھ، جوائنٹ سیکرٹری و ایلو آفیسر آک ہم ساڑی ئسر۔ داوخت آ نگران بنجائی وزیر ڈاکٹر ندیم جان پارے کہ وزارت جان جوڑی ءِ مون تروک چیلنج آتون مون تننگ کن پبی تینا لائخی تے کاریم اٹ اتیک۔ نن دا ملک و قوم الس نا راجی آسودہی کن دے ونن کاریم کروئی مریک۔ جان جوڑی نابشخ ننا اولیت ءِ، داٹی گچینی اتنگ کنا مشن ءِ۔ اوپارے کہ بیوروکریسی و ادارہ غاتا ویل آتا درک ءِ۔ الس نا ویل آتے اولیتی بنداو تیا چنکووخت اسے ٹی ایسر کینہ ۔ ننے غٹ ءِ اواری اٹ ملک و قوم انا خذمت ءِ کروئی ءِ۔ اوپارے کہ السی راجی آسودہی نا ڈت آتیا فاسٹ ٹریک آ کاریم کروئی مریک۔ الس ءِ ناجوڑی و دین تیان رکھ تخنگ گچین گام گیج آتے پک کینہ۔ وزارت جان جوڑی بنداوی وڑاٹ حقوق العباد نا وزارت ءِ۔ الس نا است خواہی تا ترجمانی ءِ کرسا غٹ آفیسر آتے خواری ولگن اٹ کاریم کروئی مریک۔ ڈاکٹر ندیم جان پارے کہ جان جوڑی نا بشخ اٹی مفاد عامہ کن انقلابی و آسودہی ڈٹ آتا بنداو ءِ تخنہ۔
