اسلام آباد۔ 17 اگست (اے پی پی) صدر مملکت ڈاکٹر عارف علوی مخلوق ءِ آسان ، اڑزان و دمدستی انصاف نا فراوانی کن بنجائی محتسبین نا کڑد اناستاءِ کرسا پارینے کہ جھیڑہ غاتا گیگ بدل ایسری آن عدالتی نظام آ بھاریم ءِ کم کننگ اٹ کمک رسینگک، محتسب نا کڑد انا اہمیت نا رداٹ اونا بارواٹی پبی آگاہی ودی کننگ نا گرج ءِ تانکہ زیات آن زیات مخلوق داڑان فائدہ ہرفنگ کے۔ اوپارے کہ بنجائی انشورنس محتسب آسان و دمدستی انصاف نا دوئی کننگ کن لس مخلوق اٹ پت ودی کننگ اٹ اہم کاریم کننگ ءِ۔ پنچ شنبے نادے آ داڑے ایوان صدر اٹی ’’انشورنس محتسب و درگہ غا ترند رفتار انصاف نا تصور ‘‘ نا سرحال آن اڈ ہلوک سیمینار آن تران کرسا صدر مملکت پارے کہ ہر پنچ آ محتسب بشمول بنجائی محتسب، بنجائی انشورنس محتسب، بنجائی بینکنگ محتسب، بنجائی خراج محتسب، و بنجائی محتسب انسداد ہراسانی اونادفترنا ماتحت کاریم کننگ اٹی ءُ۔ ’’انشورنس محتسب و درگہ غا ترند رفتار انصاف نا تصور‘‘ سیمینار نا سیریز نا اسہ بشخ اسے ہراٹی انشورنس نابشخ اتون اوار اوار کاروباری برادری نا بڑزکو شخصیت آتے ہم بٹنگ انگا تانکہ انشورنس ناکاروبار اٹی گچینی و شفافیت کن نہادی سلاہ و وژن پیش کیر۔ صدر عارف علوی پارے کہ اونا ذاتی کوشست آتا سوب آن مخلوق اٹ محتسب نا کڑد انا بارواٹی آگاہی ٹی نمان ودکی مسنے ولے ولدا ہم اواونا بارواٹی زیات آن زیات مخلوق ءِ معلومدار کننگ نا گرج آ زور شاغا۔
