اسلام آباد۔ 17 اگست (اے پی پی) دفترخارجہ نا ترجمان ممتاز زہرہ بلوچ پارینے کہ اقوام متحدہ نا خصوصی ایلچی نا کنڈآن کشمیری انسانی حق انا سرگرم کارندہ خرم پرویز و عرفان معراج نا دزگیری و اوفتیا خلوک آ دوبہ غاتیا بھاز گڑتی آتالان مراسلہ بھارتی حکومت آ گدریفنگانے ہرا بھارت نا غیرکانودی کوزہ ٹی جموں وکشمیر اٹی بھارتی کمامدارآتیا اسہ پین فرد جرم اسے، انتئے کہ او کشمیرا ٹی انسانی حق انا محافظ آتے خاموش و زیزاریفنگ نا چرجوئی ءِ تخانو، بھارت خرم پرویز و عرفان معراج تون اوار ایلو کارندہ غاتا بے سوب و غیرکانودی نظربندی ءِ چٹفے۔ پنچ شنبے نادے آ ہفتہ وار پریس حوال اٹی ترجمان دفترخارجہ پارے کہ محمد سائرس سجاد قاضی اسد مجید کان نا جاگہ غا سیکرٹری خارجہ نا زمواری تے سنبھالا، او پاکستان نا 32می سیکرٹری خارجہ مریک، او کثیر الجہتی سفارتکاری نا بھلو آزموندہ اس تخک اواقوام متحدہ ٹی پاکستان نا آخبتی مشن جنیوا ٹی 1995آن 1999اسکان خذمت سرتس، او 2005 آن 2006 اسکان نئی دہلی ٹی پاکستان نا ہائی کمشنر ، واشنگٹن ڈی سی ٹی 2006 آن 2013 اسکان وخت اس کہ 2015آن 2017 اسکان ہنگری و 2017 آن 2022 اسکان ترکیہ ٹی پاکستان نا سفیر رہینگا۔ ترجمان پارے کہ نن ڈاکٹر اسد مجید خان نا خذمت و سفارتکاری آ اونا است انا حب اٹ منت واراُن، اونا کماشی ٹی وزارت خارجہ پیچیدہ جہانی چیلنج آتون مون تس و پاکستان نا جہانی شریداری ءِ سوگو کننگ کن کاریم کرے، پاکستان نا فارن سروس نا کاریم نا کچ اٹی ودکی کن اونا کوشست آتےیات تخنگک ہرا قوم اکن دیرپابھرم تا حامل مریک، ملک اکن اونا خذمت آتیا اودے خراج تحسین پیش کینہ و آخبت اٹ اوڑکن نیک است خواہی نا خواہندار اُن۔ ترجمان پارے کہ اقوام متحدہ نا خصوصی ایلچی انسانی حق انا کنڈآں حکومت ءِ مراسلہ اس مون تننگانے ہراٹی کشمیری انسانی حق انا کارندہ خرم پرویز و عرفان معراج نا غیرکانودی دزگیری، دوبہ و نظربندی آ سخت گڑتی نا درشانی ءِ کننگانے، مراسلہ غا اقوام متحدہ نا خصوصی ایلچی انسانی حق انا دستخط ءِ، خرم پرویز جموں وکشمیر کولیشن آف سول سوسائٹی نا پروگرام کوآرڈی نیٹر ءِ وخت اس کہ عرفان معراج داسوسائٹی نا ریسرچر ءِ۔ نئی دہلی نا روہنی زندان اٹ نظربند ءُ، اقوام متحدہ نا خصوصی ایلچی داڑا گڑتی نا درشانی ءِ کرینے کہ اوفتا دزگیری و نظربندی اونا انسانی حق انا کاریم اٹ غیرکانودی اڑاند و بھارت نا غیرکانودی کوزہ ٹی جموں وکشمیر اٹی انسانی حق انا حالیت آتا مانیٹرنگ اٹ اڑاند شاغنگ آنبار ءِ۔
