نیویارک۔ 17 اگست (اے پی پی) امریکہ ٹی پاکستان نا سفیر مسعود خان پارینے کہ پاکستان سیاسی و زرگزرانی سوگوی نا کنڈا ہِننگ ءِ۔ داوخت آ نیویارک نا میئر ایرک ایڈمز پارے کہ پاکستان اسہ عظیم ءُ ملک و اسہ بردبار قوم اسے۔ جشن آزادی آ پاکستان نا سفیر مسعود خان پاکستانی بیرک ءِ چست کرے و نیویارک نا میئر ایرک ایڈمز امریکی بیرک ءِ چست کرے۔ مسعود خان تدوک آ دے امریکی شار نیویارک اٹی یوم آزادی نا دود آن تران کرسا پارے کہ او ڑکن دا گمر ناسوب ءِ کہ اینو کیہی پاکستانی امریکہ نا شاری حکومت اٹ خذمت سرتننگ ءُ۔ اومخلوق آ زور شاغا کہ او ہمو ہوکاتیا خف توپس کہ پاکستانی نژاد امریکی شاری تا پاکستان نا زرگزران آ پت سلتنے۔ اوداہیت آ زور شاغا کہ پاکستان آ پت ءِ اِلیپس، امریکہ نماوطن ءِ و پاکستان نما لمہ وطن ءِ و دا سوگو رشتہ پنِپک۔ اوداہیت انا پیدواری ءِ کرے کہ پاکستانی نژاد امریکی شاریک تدوک آ مالی سال اٹی پاکستان اٹ 3 بلین ڈالر مون تسوسر و ہنداخہ ہی زرمبادلہ اوفک داکان تدوک آ سال مون تسوسر ۔ اوپارے کہ اصل حقیقت ہمو دعویٰ تیان چپ ءِ کہ پاکستانی نژاد امریکی کمیونٹی ناملک انا زرگزران آ پت سلتنے۔ اوکمیونٹی نا باسک آتیا زور شاغا کہ مایوسی و نااومیتی نا ہچ ءُ گنجائشت اس اف و او پاکستان نا بارواٹی مستد معلومداری دوئی کیر و جعلی بیانیہ یا غلط معلومداری آ چکار کپس۔ اوپارے کہ پاکستانی اسہ بردبار قوم اسے، پاکستان برجا سال متاثرکن شرح نمو دوئی کیک و دانا بناءِ کننگ کن تیار ءِ۔ پاکستانی سفیر دود اٹی بشخ ہلنگ آ میئر نیویارک نا منت واری ءِ ہرفسا پارے کہ اوڑکن داہیت گمرنا سوب ءِ کہ اینو کیہی پاکستانی امریکہ نا شاری حکومت اٹ خذمت سرتننگ اٹی ءُ۔ داوخت آ نیویارک نا میئر پارے کہ نیویارک اٹی چندی علاقہ، تہذیب ومذہب آتیان تعلق تخوک آ مخلوق رہینگک و او تینٹ ہم داڑے برسا رہینگانے ولے داڑے ہرافک رہینگ انگ ءُ او جہانی ویل آتا ایسری کن اسہ ایلو نا آزموندہ غاتیان ہیل کننگ نا لائخی تخرہ۔ اوپارے کہ نن داخہ سال آن اسیجا رہینگ انگ اُن و اسلاموفوبیا نا برخلاف و ہموفتا برخلاف جنگ تننگ اُن ہرا تینے آن جتا لویس بینوک آتیا جلہو ناخواہندار ءُ۔
