اسلام غٹ مذہب آتا عبادت گاہ و مذہبی شعائر آتا شرف نا رغامک، ڈاکٹر قبیلہ ایاز

اسلام آباد۔ 17 اگست (اے پی پی) اسلامی نظریاتی کونسل نا چیئرمین ڈاکٹر قبلہ ایاز جڑانوالہ ٹی پیش بروک آ واقعہ غاتا مذمت ءِ کرسا پارینے کہ انتس کہ جڑانوالہ ٹی مسنے اونا مذہب،  رواج ملکی کانود و ننا معاشرتی قدر اٹی ہچ  ءُ جاگہ اس اف ، اسلام غٹ مذہب آتا عبادت گاہ و مذہبی شعائر آتا شرف نا رغامک۔ پنچ شنبے نادے آ اسلامی نظریاتی کونسل نا کنڈآن جاری بیان نا رداٹ ڈاکٹر قبلہ ایاز پارے کہ توہین مذہب نا مبینہ واقعہ غاتیا مچی اس کرسا ایلو مذہب آتا بندغ و عبادت گاہ تے شست کننگ و کانود ءِ دوٹی ہلنگ نا اسلام اٹ ہچ ءُ گنجائشت اس اف۔ داواقعہ غاتیٹی اوار غٹ شرپسند بندغ آتا برخلاف بے پرخ کانودی کارروائی کننگے۔ ہرااُرا و عبادت گاہ تے نسخان رسینگانے حکومت ءِ مرے کہ دمدستی وڑاٹ ہمو اُرا و عبادت گاہ تا بحالی کن گام گیج کننگے، مخلوق نا نجی ملکیت آتے ملوک آ نسخان نا ہم پوروی ءِ کننگے۔ اوپارے کہ اسلامی نظریاتی کونسل سانحہ سیالکوٹ نا بابت تینا خصوصی دیوان اس اڈ ہلوک 20 دسمبر 2021 ء ٹی حکومت ءِ سلاہ تسوسس کہ داوڑنا واقعہ غاتا توننگ کن المی ءِ کہ اوار ڈوہدار تے سخت سزا تننگے و داچرجوئی ٹی خصوصی عدالت جوڑ کننگے ہرادے و نن سماعت کرسا دا ڈوہ تیا ہشکا تروک آ بندغ، ڈٹ بندی کروک آ بندغ و مسیت آتیان پڑو کروک آ غٹ فتنہ پرور مخلوق ءِ قرارواقعی سزا ایتر۔