اسلام آباد۔16اگست (اے پی پی): ادرُکی مزن وزیر انوار الحق کاکڑ ءَ گوں پاکستان ءِ معاشی برجائی ءُ دیمروئی ءِ واستہ سعودی حکومت ءِ مدامیگیں کمک آنی پد ءَ شگر ءُ منت واری گران ءَ گوشتگ کہ ھاسیں سرمایہ کاری آسراتی کانسل ھاسیں رنگ ءَ سعودی عرب ءَ چہ گیر ملکی سرمایہ کاری ءَ را گیش ترند کنگ ءِ بنیا ت ءَ ایر کنت۔ چار شمبے ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ ردءَ ادارکی مزن وزیر انوار الحق کاکڑ ءَ گوں سعودی عرب ءِ سفیر نواف بن سعید احمد المالکی ءَ گند ءُ نند کت۔ سعودی سفیر ءَ مزن وزیر ءَ را سیٹ ءَ نندگ ءِ پد ءَ مبارک بات داتگ ءُ خادم حریمین شریفین، ولی عہد شہزادہ محمد بن سلمان ءُ سعودی عرب ءِ الس آنی نیمگ ءَ چہ نیکیں واھگ ءُ مبارکی دات۔ ادارکی مزن وزیر انوار الحق کاکڑ ءَ گوشت کہ پاکستان ءُ سعودی عرب ءِ نیام ءَ تاریخی ءُ جھلانکیں یکوئی است۔ آئیءَ پاکستان ءِ معاشی برجائی ءُ دیمروئی ءِ واستہ سعودی حکومت ءِ مدام کمک کنگ ءِ پد ءَ شگر ءُ منت واری گپت۔
