اسلام آباد۔ 16 اگست (اے پی پی) جرمنی نا سفیر الفریڈ گراناس بنجائی سیکرٹری جان جوڑی افتخار علی شلوانی تون اوڑدہی کرے۔ چارشنبےنادے آ وزارت جان جوڑی آن جاری بیان نا رداٹ اوڑدہی ٹی ڈی جی ہیلتھ و پمز انا ہیڈ آف ڈیپارٹمنٹ ریڈیالوجی ہم ساڑی ئسک۔ اوڑدہی ٹی جان جوڑی نا بشخ و تین پہ تینی است خواہی نا امور آ گپ وتران کننگا و پمز ہسپتال نا ایم آر آئی مشین نا خلنگ نا ہم جاچ ءِ ہلنگا۔ داوخت آ بنجائی سیکرٹری جان جوڑی افتخار شلوانی پارے کہ جرمن کمپنی سیمنز پمز اٹی ایم آرآئی مشین 6 ستمبر آ فعال کیک۔ دا بابت پمز انتظامیہ و جرمن سپلائر باوری کرفینے اوڑا جرمنی نا سفیر نا خاص وڑاٹ منت واراُٹ۔ بنجائی سیکرٹری جان جوڑی پارے کہ پمز ہسپتال بنجائی دارالحکومت نا غٹ آن بھلا ہسپتال ءِ۔ پمز ہسپتال اٹی ہڑدے 12 آن 15 ہزار مریض درمان کن بریرہ۔ پمز ہسپتال نا کارکڑد ءِ پین گچین کننگ کن گچین گام گیج آتے پک کننگ اُن۔ پمز ہسپتال نا مشین بھلو وخت اسے آن خراب ئسک ہرانا سوب آن ناجوڑ آتے مشکل مون تروک ئسک۔ افتخار علی شلوانی پارے کہ ہیلتھ سیکرٹری نا زمواری تے سنبھالنگ تون دا اہم باندات نا نوٹس ءِ ہلکٹ و پمز ہسپتال نا انتظامیہ ءِ اگست اسکان ڈیڈ لائن تسوسٹ۔ وزارت جان جوڑی نا بشخ و الس نا راجی آسودہی کن عملی گام گیج آتے پک کننگ ءِ۔
