اسلام آباد۔ 15 اگست (اے پی پی) اسپیکر قومی اسمبلی راجہ پرویز اشرف 76 یوم آزادی نا وخت آبزرگ سیاسی راہشون و مسکوہی وزیراعلیٰ سندھ سید قائم علی شاہ ، سیاسی راہشون راجہ ظفرالحق، مسکوہی وزیر مذہبی امور مفتی عبدالشکور ایماندار، مفتی منیب الرحمان، راجی شخصیت ڈاکٹر امجد ثاقب، پنی آ صحافی سہیل وڑائچ ، وقار ستی، ایڈیشنل سیکرٹری کانود سازی قومی اسمبلی محمدمشتاق و ایلوپنی آ شخصیت ہرافتے چندی زند انا بشخ آتیٹی نمان کارکڑد و خذمت سرتننگ نا اعتراف اٹ پاکستان سول ایوارڈ تننگ آ مبارکبادی تسنے۔ سے شنبے نادے آ اسپیکر تینا کلہو اٹی بزرگ سیاسی راہشون سید قائم علی شاہ نا سیاسی، راجی، آئینی و السی خذمت آتے خراج تحسین پیش کرسا پارے کہ سید قائم علی شاہ اسہ کہنہ مشق سیاسی و راجی راہشون اسے و تینا سیاسی فہم و فراست نا سوب آن اینو ہم ملکی سیاست اٹ نمان ہند اس تخک۔ سید قائم علی شاہ سیاسی ءُ راہشون اسے ہرا اسلامی جمہوریہ پاکستان نا 1973ء نا آئین ساز کمیٹی نا واحد حیات باسک ءِ و اودے آئین پاکستان آ دستخط کننگ نا شرف دوئی ءِ۔ اوپارے کہ سید قائم علی شاہ ءِ اونا سیاسی، راجی، آئینی و السی خذمت آتا اعتراف اٹی پاکستان نا بڑزکو آ سول ایوارڈ نشان امیتاز تننگ بے کچ ستاکڑزک۔ اسپیکر قومی اسمبلی مسکوہی پنجائی وزیر مذہبی امور شہید مفتی عبدالشکور ءِ اونا سیاسی ، راجی و دینی خذمت آتے خراج تحسین پیش کرسا پارے کہ مفتی عبدالشکور اسہ جید عالم دین و بااصول سیاسی راہشون اس ئسک۔ اونا دینی سیاسی و راجی خذمت آتے مدا م یات تخنگک ۔ اونا دینی و سیاسی خذمت آتا اعتراف اٹی نشان امتیاز تننگ بےکچ ستاکڑزک۔ اسپیکر قومی اسمبلی راجہ پرویز اشرف ایڈیشنل سیکرٹری کانود سازی قومی اسمبلی محمدمشتاق ءِ پاکستان نا 76 می یوم آزادی نا وخت آ صدارتی ایوارڈ تمغہ امتیاز تننگ آ مبارکبادی تس۔
