لاہور۔ 11 اگست (اے پی پی) صدر مملکت ڈاکٹر عار ف علوی پارینے کہ ہربندغ ءِ ملکی شونداری کن تینا تینا بشخ انا کڑد ءِ اداکروئی مریک، بیوروکریسی ءِ اسلام نا بنداوی اصول آتیا عمل کرسا ملک و قوم انا خذمت ءِ کروئی مریک، ایلو ملک آتیا سیبو کننگ نا جاگہ غا خودکفالت کن جہد کروئی مریک۔ داخیال آتا درشانی ءِ او جمعہ نادے آ داڑے نیشنل اسکول آف پبلک پالیسی ٹی 118 می نیشنل مینجمنٹ کورس و سینئر سرکاری آفیسر آتا گریجوایشن دود آن تران کرسا کرے۔ صدر مملکت پارے کہ ملکی شونداری ٹی سرکاری آفیسر و کارندہ غاتا کڑد بایدے بے مٹ مرے، گچین نظم و نسق و وڈی خوری نا چٹفنگ آن راج شون ہلیک۔ اوپارے کہ علم اتون اوار اوار جوزہ غاتا تربیت ہم بھاز المی ءِ۔ آفیسر آتون مخاطب مرسا اوپارے کہ انسانی زند انا تہہ ٹی گڑاس فارمیٹوسال مریک ہرافتیان نم گدرینگانورے، ہراتم نما تربیت ءِ کننگک تو اوٹی مینجمنٹ نا ٹیکنالوجی نا بابت نمے پاننگک ، مخلوق ءِ اوار دننگ نا پوسکن آ مینجمنٹ ٹیکنیکس نا بارواٹی پاننگک۔ اوپارے کہ ہربروک آ حکومت نا سیبو سینئر سرکاری آفیسر آتیا مریک، ملکی نظم و نسق ءِ چلیفنگ کن نماکڑدزیل و سُوآنبار ءِ۔
