اسلام آباد۔ 11 اگست (اے پی پی) صدر مملکت ڈاکٹر عارف علوی پارینے کہ ہرسال 11 اگست نا دے ءِ پاکستان اٹ اقلیت نا دے انا وڑاٹ اڈتننگک، اینو نا دا دے انا وخت آ ای قوم انا شونداری نا عمل اٹ اقلیت آتا اہم کڑد ءِ تالان کننگ خواوہ، نن ملکی شونداری ٹی اقلیت آتا کڑد ءِ امنا کینہ و اوفتا داڑا ستاءِ کینہ۔ صدر مملکت اقلیت آتا دے انا وخت آ تینا کلہو اٹی پارے کہ کنے خوشی ءِ کہ پاکستان اٹ اقلیت آتے آئین پاکستان اٹ ضمانت کروک غٹ سیاسی، زرگزرانی و راجی حق دوئی ءِ، آئین غٹ شاری تے اوفتا مذہبی عقیدہ یا نسل آن ایڑتر سیاسی، زرگزرانی و راجی حق انا ضمانت ایتک۔ اوپارے کہ بحیثیت مسلمان نن اسلام نا ہمو تعلیمات آن متاثر اُن ہرا ننے اسہ راج اسے ٹی ہم گرنچی و سیوت نا جوزہ نا مون آ دننگ کن اقلیت آتا حق انا رکھ و غٹ مخلوق نا نیام اٹ بریبری نا درس ایتک۔ ڈاکٹر عارف علوی پارے کہ پاکستان اقلیت آتا راجی آسودہی کن پدریسہ کوشست کرینے، ہرافتے ٹی سرکاری ملازمت آتیٹی 5 درسد کوٹہ و پارلیمنٹ نا ہڑتوم آ ایوان تیٹی اوفتے کن جتا نشست جتا کننگ اوار ءِ، د انا مسخت ملک انا سیاسی و اقتصادی شونداری ٹی اوفتا فعال بشخ ہلنگ نا است بڈی ءِ کننگ ءِ۔ اوپارے کہ اقلیتی برادری آن تعلق تخوک آ بندغ و طالب علم آتے اوفتا تعلیمی سرجزآتیٹی کمک و اوفتا عبادت گاہ تا رکھ اکن گرانٹ، مالی امداد و اسکالر شپ فراوان کننگ کن گام گیج کننگ انگءِ داگام گیج پاکستان اٹ اسہ جوان و نمائندہ راج اسے نا مون آ دننگ نا کنڈا ننا عزم انا شاہدی ءِ ۔ صدر مملکت پارے کہ ای تینا قلیت آتا مذہبی، راجی، سیاسی و زرگزرانی حق انا رکھ اکن بدل مفروک عزم انا درشانی ءِ کیوہ، نن غٹ اقلیتی گروپ آتے باور کرفینہ کہ پاکستان اوفتا حق انا رکھ و اوفتا آسودہی کن کاریم کرسا کیک۔ صدر مملکت مذہبی اسکالر و میڈیا غان خواست کرے کہ او راج ءِ اقلیت آتا حق انا بارواٹی معلومدار کیر و ملک اٹی مہرومریبت ، رواداری، ایلمی و سیوت نا کلچر ءِ مون آدیر۔ اوپارے کہ کنے اومیت ءِ کہ نن تینا اجتماعی کوشست آتا کمک اٹ اسہ سوگو و زیات شونہال پاکستان اس جوڑ کینہ ہراڑے ہر بندغ ءِ شونداری نا مزل آتے طے کننگ و تینا یکتا لائخی تے ملکی شونداری کن کاریم ا ٹ اتنگ نا موقع اس دُوبریک۔ ڈاکٹر عارف علوی پارے کہ اینو دادے ءِ اڈترسا کنے پورو یقین ءِ کہ ننا ااقلیت آک قومی شونداری نا عمل اٹ تینا اہم کڑدءِ ادا کرساکیرہ۔ اوپارے کہ دا وخت آ ای پاکستان نا غٹ اقلیتی ٹولی تیکن نیک است خواہی نا درشانی ءِ کیوہ، کنے یقین ءِ کہ او ننا ہنین آ ملک انا راجی و اقتصادی شونداری ٹی تینا بشخ ءِ شاغسا کیرہ۔
