راجی انصاف، بریبر حق و پسماندہ تپہ غاتے واکدار کننگ نا کوشست آتے برجاتخنہ، سینیٹر شیری رحمان

اسلام آباد۔ 11 اگست (اے پی پی) پیپلزپارٹی نا راہشون سینیٹر شیری رحمان پارینے کہ نن قائد اعظم محمد علی جناح و قائد الس شہید ذوالفقار علی بھٹو نا وژن نا رداٹ راجی انصاف ، بریبر حق و پسماندہ تپہ غاتے واکدار کننگ کن تینا کوشست آتے برجاتخنہ۔ اقلیت آتا قومی دے انا وخت آ تینا کلہو اٹی اوپارے کہ پاکستان اٹ رہینگوک آ غٹ اقلیتی برادری آن تعلق تخوک آ ایڑھ و ایلم تے مبارکبادی ایتیوہ۔ اوپارے کہ قائد اعظم محمد علی جناح نا دستور ساز اسمبلی نا دیوان آن تاریخ ساز تران نا پژدر اٹی مسکوہی صدر آصف علی زرداری 11 اگست آ پاکستان اٹ اقلیت آتا قومی دے ءِ اڈتننگ نا پڑو کریسس۔ دادے ءِ اڈتننگ نا مسخت پاکستان اٹ اقلیت آتا قربانی، اہمیت و ملکی شونداری ٹی شریداری ءِ امنا کننگ ءِ۔ داپیپلزپارٹی نا رواداری، شرف  و غٹ شاری تا بریبر حق انا عزم و وژن نا ڈیک ءِ ایتک۔ شیری رحمان پارے کہ قائد اعظم محمد علی جناح 11 اگست 1947نادے پاکستان نا دستور سازا سمبلی آن تینا تران اٹی بریبری، ہم گرنچی و مذہبی آجوئی نا اصول آتیا زورشاغا۔ او اسہ ہندن ءُ قوم اسے نا تصور ءِکرے ہراڑے غٹ شاری تے اسہ وڑ حق و زمواری دوئی مرے، خواہ او ہراکہ عقیدہ  یانسل آن تعلق تخے۔ قائد اعظم نا لوز آک اسہ ہندن ءُ قوم و ریاست اسے نا بنداو ءِ تخار ہرااقلیت آتا حق انا رکھ ءِ کیک و پاکستان نا شونداری و شونہالی ٹی اوفتا فعال بشخ ہلنگ ءِ پک کیک۔