کراچی۔ 11 اگست (اے پی پی) پاکستان پیپلزپارٹی نا چیئرمین بلاول بھٹو زرداری پارینے کہ اقلیت آتا حق انا رکھ ہم آئین نا پاسداری ءِ، خار و بشخنگ نا سیاست نا چٹفنگ و اقلیت آتون اوار غٹ پسماندہ تپہ غاتے راجی انصاف بیرہ پیپلزپارٹی ترفنگ کیک، بانی پاکستان قائد اعظم محمد علی جناح 11 اگست نا تاریخی تقریر اٹ پیدوار کریسس کہ پوسکن آریاست اٹ غٹ شاری تے اسہ وڑ حق و مذہبی آجوئی دوئی مریک۔ بلاول ہاؤس نا میڈیاسیل انا کنڈآن جاری بیان نا رداٹ بلاول بھٹو زرداری اقلیت آتا قومی دے آ تینا کلہو اٹی مستی پارے کہ پیپلزپارٹی اقلیت آتا حق و فائدہ غاتا رکھ انا بابت مدام عادلانہ و قابل عمل نقطہ نظر اختیار کرے، 1973نا آئین پی پی پی نا نقطہ نظر نا اسہ پیدوار ءُ درور اسے ، ہرا غٹ اقلیت آتے اسہ وڑ حق انا ضمانت ایتک۔ بلاول بھٹو زرداری پارے کہ شہید گودی بینظیر بھٹو تینا وزارت عظمی نا دور اٹی اقلیت آتا ویل آتا ایسری و اوفتا شونداری و آسودہی کن بے شمار گام ہرفے، بینظیر بھٹو اقلیت آتیکن ہراانقلابی گام تے ہرفے، اوفتے ٹی وزارت اقلیتی امور نا قیام ہم اوار ءِ۔ بلاول بھٹوزرداری پارے کہ 11 اگست آ اقلیت آتا قومی دے انا وڑاٹ اڈتننگ نافیصلہ ءِ کننگ آ مسکوہی صدر آصف علی زرداری ءِ ہم خراج تحسین پیش کیوہ۔ اوپارے کہ پیپلزپارٹی تینا غیرمسلم کارندہ غاتے قومی و صوبائی اسمبلی تا جنرل سیٹ آتیا ٹکٹ تس و سینیٹ اٹی ہم تینا غیرمسلم کارندہ غاتے پبی نمائندگی تس و ایلو جماعت آتا مقابلہ ٹی تینا حکومت نا کابینہ ٹی ہم اقلیتی برادری ءِ غٹ آن زیات نمائندگی تس۔ بلاول بھٹو زرداری پارے کہ غیرمسلم شاری تا حق و آسودہی نا بابت ہم پیپلزپارٹی ہراکانود سازی و عملی گام گیج آتے کرینے، اوفتا درور ملیپک۔ ملک انا غت اقلیت آتے ملکی شونداری ٹی کڑد آ سلام پیش کیوہ۔
