اسلام آباد۔ 11 اگست (اے پی پی) مچ آ ملک اٹی برجابشام نا پِر تا سوب آن تربیلا ڈیم پورو وڑاٹ پُرمس، ڈیم اٹی دیر انا کہول اسہ ہزار 550 فٹ، 58 لکھ 9 ہزار ایکڑ فٹ دیر انا کوڑی ساڑی ءِ۔ واپڈا کمامدارآتا رداٹ تینا پوروی آن اینواسکان تربیلا ڈیم پروجیکٹ پاکستان نا شونداری و شونہالی ٹی اہم کڑد ادا کننگ ءِ۔ داپروجیکٹ آن کشاری مسخت آتیکن پانیفراہم کننگک، نوکاپ آن بچفنگ اٹ کمک رسینگک و نیشنل گریڈ ءِ اڑزان بجلی فراوان کننگک۔ تربیلا ڈیم اٹ قابل استعمال دیر کوڑی کننگ نالائخی 58 لکھ 9 ہزار ایکڑ فٹ ءِ۔ تربیلاڈیم اٹ دیر انا بھلو کچ اسے ٹی ساڑی گری ملک انا کشاری بشخ و اڑزان پن بجلی نا پیدوار کن بھاز ستاکڑزک۔ تربیلا پاکستان اٹ بجلی ودی کننگ نا ہم غٹ آن بھلا پن بجلی گھرءِ تربیلا چارمیکو توسیعی ڈٹ پورو مننگ آ تربیلا پن بجلی گھر آن بجلی ودی کننگ نا لائخی 4 ہزار 888 میگاواٹ مسنے وخت اس کہ تربیلا پنچ میکو توسیعی ڈٹ انا پوروی آن پد دا لائخی ودسا 6 ہزار 418 میگاواٹ مریک۔
