اسلام آباد۔10اگست (اے پی پی): مزن وزیر محمد شہباز شریف ءَ گوشتگ کہ 16 ماہ ءِ وھد ءُ پاس ءَ ٹوھیں ٹوھیں جیڈھ بوتگ، سک ءَ چہ سک تریں جیڈھ آنی گیواری ءِ واستہ کشک پٹ ءُپول کتگ، وت مہ وتی کمک ءُ شور ءُ مشور ءِ گوما جوانیں حکومت چلائینتگ، گوستگیں وھد ءَ جوانیں کار کنوکیں اپسرگ آناں ڈلگچار کنگ بوتگ، پیسریگیں حکومت ءَ السی وشھالی ءِ منصوبگ آناں بند کتگ، اللہ پاک ءَ پاکستان ءَ را ڈکال ءَ چہ رکھینتگ۔ سسٹم ءِ ھرابی ءَ را دور کنگ لوٹ ائیت، من دل یکیم آں کہ جاور گیش گہتر بنت۔ اے ھیالانی درشانی آئی ءَ پنچ شمبے ءِ روچ ءَ بنجاھی سیکرٹریز ءَگوں بروپہ ھیری گند ءُ نند ءِ ساھت ءَ تران کنان ءَ کت۔ مزن وزیر ءَ گوشت کہ 16 ماہ ءِ لُکوکیں وھد ءُ پاس ءَ ٹوھیں ٹوھیں جیڈھ بوتگ، باز سیاسی پارٹی آں چہ باسک زورگ ءُ حکومت ءِ جوڑیشت ءِ ھوالگ ءَ ھم یک ٹوھیں جیڈھ ءِ دیم ءَ بوتگ ءُ 13 پارٹی آنی اے حکومت بوتگ ءُ وت مہ وتی کمک ءُ شور ءُ مشور ءِ گوما باز جوانیں رنگ ءَ حکومت چلائینگ بوتگ ءُ اے تاریخ ءِ بھر جوڑ بیت کہ نوک دیمروئی کنوکیں ملک آنی تہ ءَ ھم باز کسی پارٹی ءَ چہ جوڑیں حکومت ھم چل ئت کنت۔ شرط ھمیش انت کہ السی ازمت ءِ جوزگ بہ بیت۔
