کوئٹہ۔ 10 اگست (اے پی پی) وزیراعلیٰ بلوچستان میر عبدالقدوس بزنجو پارینے کہ پوسکن آمردم شماری آ گڑاس سیاسی حلقہ غاتا کنڈآن برجا شرہ بے معنی ءِ پوسکن آ مردم شماری آ تنقید کروک آک 1998و 2017نا مردم شماری تاہم جاچ ءِ ہلیر مردم شماری مفننگ آن بلوچستان ءِ ملوک آ نسخان نا زموار آتا ہم تعین ءِ کننگے نن راستکی تے ہرسا پوسکن آ مردم شماری ءِ امنا کرین، پوسکن آ مردم شماری ٹی بلوچستان اٹی آبادی ودنگ نا کچ ایلو صوبہ غاتیان زیات ءِ، بلوچستان نا ویل قومی اسمبلی ٹی ارٹ یا چار نشست آتا ودنگ آن ایسر مفک داڑکن سینیٹ ءِ واکدار جوڑ کروئی مریک ہراٹی غٹ صوبہ غاتا متناسب نمائندگی ءِ۔ داڑے جاری مروک اسہ پالیسی بیان اسے ٹی وزیراعلیٰ بلوچستان میر عبدالقدوس بزنجو پارے کہ ننا اولیکو دے آن موقف ءِ کہ این ایف سی ٹی وسیلہ غاتا بشخنگ نا فارمولا ٹی ایلو سوب آتے ہم اوار کننگے آبادی اتون اوار اوارپسماندگی رقبہ و امن و ایمنی نا حالیت آتا عوامل آتے ہم اوار کننگے دا عوامل آتا اوار مننگ آن بلوچستان ءِ این ایف سی ٹی فائدہ ملنگ کیک۔ اوپارے کہ صوبہ نا غٹ سیاسی جماعت آتے سلہ ءِ کہ بریر اواری اٹ تولسا صوبہ نا فائدہ غاتا رکھ ءِ کین اسیجائی جہد اٹ بنجاغان تینا حق ءِ امنا کرفنگ کینہ اگہ نن دا بابت اسہ پنہ غا بفنہ تو بنجا وخت اس ہم ننا حق ءِ تفک صوبہ نا غٹ سیاسی سرکڑدہ غاک دور اندیشی و سیاسی بالغ نظری نا درشانی ءِ کیر اسہ ایلو آ تنقید نا جاگہ غا حقیقت پسندانہ و فکری وڑاٹ اسیجائی لائحہ عمل اس اختیار کننگے۔ وزیراعلیٰ میر عبدالقدوس بزنجو پارے کہ دا راست اف کہ بیرہ بلوچستان نا آبادی ءِ کم کننگانے بلوچستان نا آبادی نا کچ اٹ ودکی مسنے ہراکہ ایلو صوبہ غاتا مقابلہ ٹی زیات ءِ۔ اوپارے کہ سینیٹ ءِ واکدار کننگ نا گرج ءِ ہراڑے غٹ صوبہ غاتا بریبری نا بنداو آ نمائندگی ءِ، ننا ہراضلع غاک پسماندہ ءُ اوفتے کن خصوصی گرانٹ اس بایدے مرے ایلو شون ہلوک ملک آتیٹی ہم دا وڑوڈول رواج ءِ اگہ نن بیرہ آبادی ءِ بنداو جوڑ کرسا شونداری نا تغ ء ِ ہُننگ اُن تو دا بیرہ تغ اس ہی سلک۔ وزیراعلیٰ پارے کہ اگہ آبادی نا بنداو آ وسیلہ غاتا بشخنگ نا خواست کرین تو دا غلط مریک پگہ ولدا دا باندات صوبہ ٹی بلوچ پشتون آبادی اتون اوار اوار ضلع غاتا آبادی نا بابت ہم بش مریک نن دا ہیت ءِ امنا کینہ کہ ساڑی آ مردم شماری ٹی ہم خامی ضرور مروئے داحقیقت ءِ ہم مننگے کہ گڑاس ضلع غاتیٹی آبادی ءِ غیر فطری وڑاٹ زیات آن زیات پیش کننگا ننا گڑاس ہندن ءُ ضلع ہم اریر ہراڑے نوکاپ نا سوب آن بھاز انگا مخلوق ہمپیر ہمپوک آتا اندراج مردم شماری ٹی مننگ کتو۔ اوپارے کہ نن اوکان پد ہم دا مردم شماری ءِ صوبہ نا گیشتر فائدہ غاتیٹی امنا کرین ننا سیاسی سرکڑدہ غاتے دہ سال اٹی مردم شماری نا مفننگ و ساڑی آ مردم شماری نا شش سال آن پد اڈتننگ یات اف مردم شماری مفننگ آن صوبہ ءِ بھاز نسخان رسینگا۔ وزیراعلیٰ پارے کہ اسہ کساس اسے نا رداٹ ننے این ایف سی ٹی سالانہ دہ ارب روپئی کم ملا صوبہ نا دانسخان آ صوبہ نا سیاسی سرکڑدہ غاک انت اکن چپ ئسر دا نسخان نا زموار آتا ہم تعین بایدے ضرور مرے۔ اوپارے کہ نن یک و نیم سال انا گونڈ مد اٹی ہراگام گیج آتے کرین او ملوک ءُ کتاب اسے آنبار ءُ، بلدیاتی گچین کاری تا ساف و شفاف اڈتننگ ریکوڈک نا معاہدہ بلوچستان نا حق آ اصولی موقف و پین بے حساب سرسہبیک اوار ءُ۔ وزیراعلیٰ پارے کہ سیاسی سرکڑدہ غاک نان ایشوز تا جاگہ غا حقیقت پسندانہ سیاسی طرزعمل ءِ اختیارکیر نن اواری اٹ ہی بلوچستان نا حق ءِ ادا کننگ کینہ۔
