کوئٹہ۔ 10 اگست (اے پی پی)ڈپٹی کمشنر ژوب محبوب احمد اچکزئی ڈپٹی کمشنر ژوب دفتراٹی 5 سال اسکان نا کم وئی چناتے پولیو نا رکھی پڑی کنفسا قومی انسداد پولیو مہم ژو ب انا بناءِ کرے۔ داوخت آ اے ڈی سی جی ژوب ذیشان پانیزئی، اسسٹنٹ کمشنر ژوب حافظ محمد طارق، ڈی ایچ او ژوب و محکمہ جان جوڑی نا آفیسر آک ساڑی ئسر۔ ڈپٹی کمشنر دا وخت آ تینا اسہ کلہو اسے ٹی پارے کہ پولیو نا پڑی کُنفنگ نا مسخت چناتا جان جوڑی ءِ رکھ فراوان کرسا اوفتے آخبتی معذوری آن بچفنگ ءِ۔ ہراڑکن حکومت اسہ منظم حکمت عملی اسے اٹ داڑا کاریم کننگ ءِ و ضلعی کہول آ شار انا تہہ و مرمرانگا علاقہ غاتیکن ٹیم گدریفنگانے ہرافتے پورو وڑاٹ سیکورٹی تننگانے تانکہ اوفتے انسداد پولیو مہم اٹی مشکل آتون مون تروئی تمپ۔ اوپارے کہ پولیو موذی مرض اسے ہرا اسہ دین اسے نا کمک اٹ پنچ سال اسکان نا چناتے آخبتی وڑاٹ جونی و اعصابی وڑاٹ زہمی کیک۔ و ہمو چنا ولدا مچ آ زند معذوری نا گواچی مریک۔ ڈپٹی کمشنر ژوب محبوب احمد اچکزئی پارے کہ ننا آخبت نا جوڑ کروک چناتا صحت مند زند انا خاطر عالم دین، سیاسی سرکڑدہ، قبائلی سرکڑدہ، لمہ و باوہ ، سوشل ورکرو راج انا غٹ بندغ آتے مرے کہ پولیو نا چٹفنگ کن حکومت تون پبی تفسا غٹ چناتے پولیو نا پڑی کنفنگ اٹ کمک کیر تانکہ اسہ چناس ہم پولیو نا دا مہم آن سلپ۔
