اسلام آباد۔ 09 اگست (اے پی پی) مالی سال 2023اٹی مالی ادارہ غاک کشاری فنانسنگ نا رداٹ 1776 ارب روپئی بشخار و اسٹیٹ بینک آف پاکستان (ایس بی پی) نا کنڈآن مقرر کروک 1819ارب روپئی نا کشاری وام تا ہدف نا 97.6درسد دوئی کریر وخت اس کہ مالی سال 2022اتی بشخوک آ 1419ارب روپئی نا مقابلہ ٹی 25 درسد آں زیات نا متاثر کن ودکی درج کرے۔ کشاری وام تا واجب الادا پورٹ فولیو ہم 10 درسد ودکی اتون جون 2023ء نا ایسر آ 760 ارب روپئی اسکان سرمس وخت اس کہ جون 2022ء نا ایسری آ دا 691 ارب روپئی ئس۔ مالی ادارہ غاتا اجتماعی کوشست و 2022ء نا بھسکار نوکاپ، ساڑی آ سال تیٹی ودوک آ ان پٹ خڑچ و زری سختی اتون اوار چندی چیلنج آتا پس منظر اٹ کروک آ چندی گام گیج مالی سال 2023ء ٹی بھلاکارکڑد نا سوب جوڑ مس۔ چندی گام گیج آتیٹی اسٹیٹ بینک انا چیمپیئن بینک ماڈل و ایگریکلچر کریڈٹ سکورنگ ماڈل اوار ئسر۔ ہر ا کشاری وام تا ودکی نا بابت مالی ادارہ غاتا کمک اٹ اہم کڑد ادا کرے، خاص وڑاٹ پسماندہ علاقہ غاتیٹی ہراڑے مالی سال 2023ء ٹی نمان نمود نشان تسوسس۔ داکان بیدس کشاری کریڈٹ ایڈوائزری کمیٹی (اے سی اے سی) نا سٹریٹجک راہشونی و اسٹیٹ بینک انا کنڈآن فنانسنگ نا کڑی چاروکی کشاری وام تے ترند کننگ اٹ پین کمک فراوان کرے۔
