اومیت ءِ بھارت پاکستان نا کنڈآن بھارت نا مقبوضہ کشمیر تون اوار اہم ایسر نا چاری ویل آتا ایسری کن گپ وتران نا سلہ نا مثبت ورندی ءِ ایتک، سفیر مسعود خان

واشنگٹن۔ 09 اگست (اے پی پی) پاکستان اومیت ظاہر کرینے کہ بھارت پاکستان نا وزیراعظم شہباز شریف نا کنڈآن بھارت نا غیرکانودی کوزہ ٹی جموں وکشمیر تون اوار اہم ایسر نا چاری ویل آتا ایسری کن گپ وتران ناسلہ نا مثبت ورندی ءِ ایتک۔ امریکہ ٹی پاکستان نا سفیر مسعود خان تدوک آ دے ڈیہہ اٹی مروک آ تازہ پیش رفت آتا بابت امریکی ہفتہ وار میگزین نیوز ویک نا آرٹیکل اٹی امریکہ غا زور شاغانے کہ او شدید بے چیٹی نا گواچی مقبوضہ کشمیر آ پین چکار کے۔ اوپارے کہ نن مدام بھارت تون سفارت کاری نا کسر ءِ اختیار کرین، وزیراعظم پاکستان اسہ وار ولدا گپ وتران نا سلہ خلکنے، امریکہ ہم پاکستان و بھارت نا نیام اٹ گڑتی نا ویل آ براہ راست مذاکرات نا مخ تفی نا درشانی ءِ کرینے۔ مسعود خان پارے کہ ننے اومیت ءِ کہ نئی دہلی نا کنڈآن تین پہ تینی میل جول نا ورندی ملک۔ پاکستانی سفیر ’’یوم استحصال ‘‘ آ ہیت کرسا خبڑدار کرے کہ بھارت نا 5 اگست 2019 آ تینا غیرکانودی کوزہ ٹی جموںو کشمیر نا غیرکانودی الحاق آن جھیڑہ ئی علاقہ نا آبادی نا کچ ءِ بدل کننگ کون آ گام گیج ڈیہہ نا سلامتی کن بھلو خطرہ اسے۔ اوپارےکہ حالیت آک خراب مرسا ہِننگ ءُ دابیرہ الحاق الوکہ بلکن دا پوسکن آ ڈومیسائل کانود ئس ہرا بھارت نا غیر کانودی کوزہ ٹی جموں وکشمیر اٹی غیر ہندی باتی تا بننگ نا کسر ءِ ملا و تینا سلہہ بند فوج ءِ جموں وکشمری نا تہہ ٹی ڈغار دوئی کننگ نا موکل تننگ ءِ ہنداسوب آن او آبادیاتی ساخت ءِ بدل کننگ ءِ و ملسم گیشتری ءِ اقلیت اٹ بدل کننگ کن دُوارہ گچین کاری حلقہ بندی ہم کننگ ءِ۔ پاکستانی سفیر علاقائی حالیت آتیا گپ وتران کرسا پارے کہ اوغانستان نا زرگزرانی آخبت ملک اٹی سوگوی آ منحصر ءِ۔ اوپارے کہ ننا اسیجائی مسخت دہشت گردی ءِ چٹفنگ و بنداوی پنجر نا شونداری کن کاریم کننگ ءِ تانکہ نن تینا اقتصادی جغرافیہ غان فائدہ ہرفنگ کین، دا اقتصادی جغرافیہ ءِ پین رابطہ، اقتصادی شریداری کن کاریم اٹ اتنگ مریک و ہردروشم اٹ دہت گردی دا مسخت نا دوئی کننگ اٹ اڑاند ءِ۔