اسلام آباد۔ 09 اگست (اے پی پی) وزیراعظم محمد شہباز شریف پارینے کہ کبین تھرمل توانائی ءِ 10 ہزار میگاواٹ شمسی توانائی ٹی بدل کننگ نا انقلابی گام انا رداٹ حکومت بجلی نا پیدوار کن شمسی توانائی نا انقلابی ڈٹ آتا بناءِ کرینے ہرانا رداٹ تدوک آ دے اسہ لکھ ٹیوب ویل آتے شمسی توانائی آ گدریفنگ نا پروگرام نا بناءِ کننگانے۔ چارشنبے نادے آ تینا اسہ ٹویٹ اسے ٹی اوپارے کہ ٹیوب ویل آتا سولرائزیشن آن بزغرآتے اڑزان بجلی مہیا مریک۔ وزیراعظم پارے کہ دا گام آن کشاری پیدوار اٹی ودکی و خورانا گرج آتیٹی خودکفالت دوئی مریک۔ وزیراعظم پارے کہ ننا زرگزران ہائی پاور ٹیرف تون شون ہلنگ کپک، ننے کبین ایندھن آ چلینگوک آ پاور پلانٹ آتے بدل کروئی مریک، کبین ایندھن آن چلینگوک آ پاور پلانٹ آک الس آ بھاریم و گردشی وام اٹی ودکی نا سوب ءُ۔ وزیراعظم پارے کہ ٹیوب ویل آتا سولرائزیشن ڈٹ آ 377 ارب روپئی خڑچ مریک۔ اوپارے کہ سولر، نیوکلیئر و کول پاور ڈٹ آتیان بیدس مخلوط حکومت ہائیڈرو پاور ڈٹ آتا شونداری آہم چکار کرینے ، نن برادر ملک سعودی عرب ءِ دیامربھاشاڈیم اٹ زرکاری نا سلہ خلکونن۔
