وزیراعظم محمد شہباز شریف نا جی ایچ کیو ٹی شہید آتا خاہوت و غازی تا اعزاز اٹی اڈ ہلوک دو دآن تران

راولپنڈی۔ 08 اگست (اے پی پی) وزیراعظم محمد شہباز شریف پارینے کہ پاکستان شہید و غازی تا قربانی تا سوب آن سیکورٹی نا لحاظ اٹ ہمیشہ کن محفوظ مسنے، ساڑی حکومت ملک ءِ مشکل زرگزرانی حالیت آتیان کشنگ کن بے پناہ کاریم کرے، پاکستان نا شونداری و شونہالی نا اسہ جوان و مربوط نظام اس وجود اٹی بسنے، اواری اٹ مون آ کانہ تو اسہ مشکل اس ہم ننا کسر اٹ اڑاند مننگ کپک۔ داخیال آتا درشانی ءِ سے شنبے نادے آ جی ایچ کیو ٹی شہید آتا خاہوت و غازی تا اعزاز اٹی اڈ ہلوک دود آن تران کرسا کرے۔ داوخت آ بنجائی وزیر خواجہ محمد آصف، مریم اورنگزیب، احسن اقبال، پاک فوج انا سروک جنرل سید عاصم منیر و سلہہ بند فوج انا بڑزکو آفیسر آتیان بیدس شہید آتا خاہوت و غازی تا بھلو کچ اس ہم ساڑی ئسر۔ وزیراعظم وطن نا دفاع کن تینا جون تے ندر کروک آ شہید و غازی تے خراج عقیدت پیش کرسا پارے کہ پاکستان نا دفاع کن اوہرا عظیم قربانی تے تسر اوفتا درور ملپک، پاکستان نا جوڑ مننگ آن ہلیس اینو اسکان داقربانی تا چرجوئی برجاءِ۔ اوپارے کہ دا عظیم و پروقار دود اٹی شہید آتا خاہوت و غازی تتون اوڑدہی کنکن گمر نا سوب ءِ۔ وزیراعظم پارے کہ لمہ وطن نا دفاع کن شہید آک جیرت و نرزوری اٹ دشمن نا مقابلہ ءِ کریر، اینو پاکستان ءِ جوڑ مروک 76 سال مننگ والا ءِ، پاکستان ءِ رکھ کننگ کن شہید و غازی تا قربانی تے قیامت اسکان یات تخنگک، ننا شہید و غازیک تینا قربانی تے اٹ ہرا کسر ءِ متعین کریر ننے اوڑا چلینگوئی ءِ۔ وزیراعظم پارے کہ قوم تینا شہید آتا قربانی تے اسُل است آن دننگ کپک۔ اوپارے کہ پاکستان اسہ جوہری طاقت اسے، شہید وغازی تا قربانی تا سوب آن سیکورٹی نا لحاظ اٹ پاکستان قیامت اسکان کن محفوظ مسنے، دشمن داسہ ننے خراب انگا نظر اٹ ہُننگ کپک۔ وزیراعظم پارے کہ ساڑی حکومت نا بے پناہ خواری نا سوب آن پاکستان مشکل حالیت آتیان پیش تمانے، ننے غٹ ءِ اواری اٹ پاکستان نادُوارہ تعمیر ءِ کروئی ءِ۔ اوپارے کہ ننے نیزگاری و بیروزگاری ءِ چٹفوئی ءِ، شہید و غازی تے خراج عقیدت پیش کننگ نا گچین وڑ پاکستان ءِ زرگزرانی وڑاٹ سوگو ملک اس جوڑ کننگ ءِ، وسیلہ غاتا بشخنگ نا جاگہ غا وسیلہ غاتا انصاف اٹ بشخنگ کن اسہ نظام اسے آ متفق مروئی ءِ، ننے غٹ ءِ اواری اٹ پاکسان ءِ دوارہ جوڑ کروئی ءِ۔ اوپارے کہ پگہ ننا حکومت نا مد چٹک، آئینی خواست انا رداٹ اقتدار نگران حکوتم نا دوٹی ایتنہ۔ وزیراعظم پارے کہ پاکستان نا شونداری و شونہالی نا اسہ جوان مربوط نظام وجود اٹی بسنے، حکومت و غٹ ادارہ غاک اواری اٹ اسہ جوان  ءُ نظام اس وضع کرینو۔ ملکی شونداری و شونہالی کن چار بشخ آتیا چکار کننگ انگ ءِ، ننے کشت وکشار نا بشخ ءِ شون تروئی ءِ، معدنیات نا کھرب آ ڈالر نا کوڑی تے کاریم اٹ اتوئی ءِ، انفارمیشن ٹیکنالوجی ءِ مون آ دروئی ءِ، دفاعی لائخی تے پین سوگو کروئی ءِ۔ وزیراعظم پارے کہ دنیا و خلیجی ملک آتیان ارب آڈالر نا زرکاری گمانی ءِ،اوپارے کہ آرمی چیف جنرل سید عاصم منیر و اونا ٹیم پاکستان نا شونداری نا ہراماڈل ءِ تسر اوڑا اوستاکڑزنگ نا لائق ءُ، ایس آئی ایف سی پاکستان نا شونداری نا روڈ میپ ءِ۔