وزیراعظم محمد شہباز شریف نا جی ایچ کیو نا سپاروکی دورہ، آرمی چیف وزیراعظم ءِ بخیرکرے ، یات گار شہداء آ پھل آتا چادر اس شاغا

راولپنڈی۔ 08 اگست (اے پی پی) وزیراعظم محمد شہباز شریف سے شنبے نادے آ جی ایچ کیو نا سپاروکی دورہ ءِ کرے۔ آئی ایس پی آر نا رداٹ جی ایچ کیو آ بننگ آ آرمی چیف وزیراعظم ءِ بخیرکرے۔ وزیراعظم پرنسپل اسٹاف آفیسر آتون اوڑدہی کرے۔ وزیراعظم ءِ داوخت آ گارڈ آف آنر پیش کننگا اویات گار شہداء آ پھل آتا چادر اس شاغا۔ وزیراعظم آرمی آڈیٹوریم اٹی شہید و غازی تے خراج عقیدت پیش کننگ کن اڈ ہلوک دود انا مہمان خاص ہم ئسک۔ وزیراعظم شہید، غازی و اوفتا خاہوت آتے لمہ وطن نادفاع کن اوفتا ان گنت قربانی و خذمت آتیا زبردست خراج تحسین پیش کرے۔ وزیراعظم ملک انا علاقائی سالمیت نا رکھ و مچ آ پاکستان اٹی دہشت گردی نا لعنت نا چٹفنگ کن سلہہ بند فوج انا کڑد انا ستاءِ کرے۔ اوپارے کہ شہید و غازیک ننا فخر ءُ و اوفتا عزت و تکریم ہرپاکستانی آ المی ءِ نن دااسُل است آن دپن کہ اینو نن ہراامن و آجوئی آن لطف اندوز مننگ اُن او دا مش انا ہمو نرزور مارتا بے مٹ قربانی تا سوب آن ءُ۔ ای پاکستان کن تینا دوست آتا قربانی ءِ تننگ آ اوفتا خاہوت ءِ سلام پیش کیوہ۔ اوپارے کہ داسہ دا ننا فرض ءِ کہ نن ہر پاکستانی نا شونہالی و خیرخواہی کن تینا شہید و غازی تا عظیم قربانی تا ادراک ءِ کین۔ اوپارے کہ ہرافک شہید آتا یات گار آتا بے شرفی ءِ کریر ، اوفتا بوز دا ملک انا تاریخ اٹ مون مریک و پاکستان نا قابل فخر مخلوق اوفتے اسُل است آن دپک۔ وزیراعظم شہید آتا 70خاہوت و 30 جنگی ٹھپی تیٹی خصوصی امداد نا چیک بشخا۔ شہید آتا چناتیٹی تعلیمی سرجزآتیکن لیپ ٹاپ ہم بشخا۔