وزیراعظم نا کسبی زمواری تا اداکننگ اٹی زند انا بازی ءِباتروک آ صحافی تیکن فنڈ اسے نا ٹہیفنگ نا پڑو

اسلام آباد۔ 08 اگست (اے پی پی) وزیراعظم محمد شہبا ز شریف کسبی زمواری تا اداکننگ اٹی زند انا بازی ءِ باتروک آ صحافی تیکن خصوصی فنڈ انا قیام نا پڑو کرینے ہرانا رداٹ داوڑ شکست اسے ٹی زوال کروک آ صحافی تا خاہوت ءِ 40 لکھ روپئی  تننگک وخت اس کہ وزیراعظم صحافی تیکن پاکستان نا تاریخ اٹ اولیکو وار ہیلتھ کارڈ نا ہم بناءِ کرینے۔ داخیال آتا درشانی ءِ او سے شنبے نادے آصحافی، فنکارآتیکن ہیلتھ انشورنس کارڈ، پاکستان کوڈ ، ڈیجیٹل ریپازٹری آف فیڈرل لاز موبائل ایپ و ویب سائٹ نا بنانا دود آن تران کرسا کرے ۔ داوخت آ بنجائی وزیر حوالکاری و شینکاری مریم اورنگزیب ہم تران کرے وخت اس کہ وزیر کانود سینیٹر اعظم نذیر تارڑ ، بنجائی سیکرٹری حوالکاری و شینکاری سہیل علی خان، صحافی و میڈیاورکرآتا سرکڑدہ غاک ہم ساڑی ئسر۔ وزیراعظم پارے کہ مرض آک زند انا بشخ ءُ۔ ہیلتھ کارڈ انا بناغا غٹ ءِ مبارکبادی ایتیوہ۔ داڑکن مریم اورنگزیب، سیکرٹری حوالکاری و اونا ٹیم انا خصوصی منت واری ءِ ہرفنہ۔ اواسہ بھلو زمواری اس اداکرینے۔ دا صحافت نا پڑاٹ اسہ انقلابی گام اسے۔ ورکنگ جرنلسٹ تینا فرض انا ادائیگی ٹی بھاز چیلنج وخطرہ غاتون مون ایتک۔ پاکستان ءِ ڈیجیٹل ریپازٹری آف فیڈرل لاز، موبائل ایپ و ویب سائٹ نا بناآ وزیرکانود و اونا ٹیم  ءِ ہم مبارکبادی ایتنہ۔ داڑان داسہ قوم و مچ آ دنیا ءِ کانود اسکان رسینگ دوئی مریک۔ غٹ کانود و آئینی دفعہ غاتیان دمدستی وڑاٹ کمک دوئی کننگ مریک۔ داپاکستان نا تاریخ اٹ اولیکووار مسنے۔ وزیراعظم پارے کہ وزیرحوالکاری مریم اورنگزیب تون سلابت اٹ فیصلہ کرینے کہ ہمو صحافی ہرا فرض انا اداکننگ اٹی زند آن دوتے سلے تو اوڑکن خصوصی فنڈ اس جوڑ کننگ انگ ءِ۔ داوڑنا شکست آتا گواچی مروک آ صحافی تا خاہوت ءِ 40 لکھ روپئی نا زر انا وزیراعظم فنڈ آن ادائیگی مریک، گوکہ دا زر اینو نا حالیت آتیٹی زیات اف ولے دا بناءِ۔ ہراتم پاکستان ءِ پین وسیلہ دوئی مریک تو اوٹی ودکی مریک ۔ اوپارے کہ ای وزیراعلیٰ پنجاب ئسٹ ہمووخت آہراپولیس کارندہ یا آفیسر تینا فرض انا اداکننگ اٹ جون تے ندر کریرہ اوفتے اول 30 لکھ روپئی تننگاکہ و و ولدااوفتے ودفسا 5 کروڑ روپئی اسکان ودفین۔