اسلام آباد۔ 08 اگست (اے پی پی) بنجائی وزیر حوالکاری و شینکاری مریم اورنگزیب پارینے کہ ورکنگ جرنلسٹس و فنکار آتیکن ہیلتھ کارڈ انا بنا ووزیراعظم شہبازشریف نا وژن نا پوروی ءِ۔ او سے شنبے نادے آ داڑے صحافی و فنکارآتیکن ہیلتھ کارڈ و وزارت کانود نا کنڈآن پاکستان کوڈ، ڈیجیٹل ریپازیٹری آف فیڈرل لاز موبائل ایپلی کیشن و ویب پورٹل نا بنانا دود آن تران کریکہ۔ دود اٹی وزیراعظم شہباز شریف ، وزیرکانود اعظم نذیر تارڑ ، وزیراعظم نا کوآرڈی نیٹر زرگزران و توانائی بلال اظہر کیانی، قومی اسمبلی نا باسک مہناز عزیز تون اوار سیکرٹری حوالکاری ، پرنسپل انفارمیشن آفیسر و صحافی و فنکارآتا بھلو کچ اسے ٹی بشخ ہلکر۔ بنجائی وزیر حوالکاری پارے کہ اینو اہم و تاریخی ءُ دے اسے ہراتم وزیراعظم نا پارت آ ورکنگ جرنلسٹس وفنکارآتیکن ہیلتھ کارڈ جاری کننگ انگ ءِ۔ اوپارے کہ اسہ ہفتہ مست وزارت حوالکاری و اسٹیٹ لائف نا نیام اٹ ہیلتھ انشورنس کن مفاہمت نا یات داشت آتیا دستخط آتا دود اس اڈہلکوسس ہراٹی وزیراعظم شہباز شریف ہم شریک مس، اینو دا ہیلتھ انشورنس نا باضابطہ بناکرینے۔ اوپارے کہ وزیراعظم شہباز شریف نا بحیثیت اپوزیشن لیڈر ہراوژن ئسک، اینو اوڑا عملدرآمد کننگ انگ ءِ۔ بنجائی وزیر حوالکاری پارے کہ وزارت کانود غٹ فیڈرل کانود آتے ایپلی کیشن و ویب پورٹل نا دروشم اٹ پاکستان نا الس کن تیار کرینے ہراڑا وزارت کانود ءِ مبارکبادی پیش کینہ۔ بنجائی وزیر حوالکاری صحافی و فنکار آتیکن ہیلتھ کارڈ انا فراوانی ٹی گچین کوشست آتیا بنجائی سیکرٹری حوالکاری و پرنسپل انفارمیشن آفیسر آتا منت واری ءِ ہرفے۔
