اسلام آباد۔ 07 اگست (اے پی پی) وزیراعظم محمد شہباز شریف پارینے کہ اسپیشل انویسٹمنٹ فیسلی ٹیشن کونسل و سی پیک ڈٹ اواری اٹ ملک ءِ زرگزرانی شونداری نا کنڈا دیرہ، چینی کمپنی تا پاکستان اٹ کاریم کننگ آن روزگار نا پوسکن ءُ وارخواہی ودی مریک، چینی کمپنیک سی پیک اٹی 30 ارب ڈالر آن زیات زرکاری کرینو۔ داخیال آتا درشانی ءِ اودوشنبے نادے آ داڑے سی پیک و شونداری کاریم تیٹی خذمت سرتروک آ چینی کمپنی و بینک آتے ایوارڈ تننگ نا دود آن تران کرسا کرے۔ وزیراعظم پارے کہ سی پیک ڈٹ آک پاکستان نا صنعتی شونداری ٹی اہم کڑد ادا کریر ہراڑان نئے بیرہ ملازمت آتا وارخواہی ودی مس بلکن ہڑتوم آ ملک آتا نیام اٹ ایلمی و زرگزرانی تعلقداری سوگو مسنے۔ نن بیلٹ اینڈ روڈ انیشی ایٹیو نا رداٹ سی پیک ڈٹ آتا 10 سال پورو مننگ نا دود آتے اڈتسونن۔ دا ڈٹ چینی صدر شی جن پنگ نا ذہانت و وژن نا ڈیک ءِ۔ دا ڈٹ آتا سوب آن چینی کمپنیک 30 ارب ڈالر نا زرکاری پاکستان اٹ کرینو۔ صدرشی جن پنگ نا کماشی ٹی چینی حکومت و کمپنیک پاکستان اٹ زرگزرانی منظرنامہ ءِ بدل کننگ اٹ اہم کڑد ادا کننگ ءُ۔ اوپارے کہ داسہ سی پیک نا ارٹ میکو ریسہ بناکرینے ہراٹی گرین کوریڈور ، انوویشن ، آئی ٹی کوریڈور، خصوصی اقتصادی زون کون آ بھلا ڈٹ آک اوار ءُ۔ دا سی پیک نا رداٹ چینی و پاکستانی حکومت نا کاروباری ڈٹ آک ءُ۔ اسپیشل انویسٹمنٹ فیسلی ٹیشن کونسل (ایس آئی ایف سی) حکومت نا اہم ءُ گام اسے۔ داکثیر الجہتی فورم اسے ہراٹی بنجا، صوبائی اکائی و پاک فوج انا نمائندگی اوار ءِ۔ آرمی چیف جنرل عاصم منیر دا باندات اٹ سرگرمی اٹ بشخ ہلنگ ءِ۔ او پاکستان نا کاز ءِ مون آ دننگ نا خواہندار ءِ ہمو ورناک ہرافتے تون تعلیم و ٹیلنٹ تو ارے الے اوفتے تون ملازمت اف اوفتے داڑان روزگار نا وارخواہی دُوبریک و او قومی شونداری ٹی اہم کڑد اس ادا کننگ کیرہ۔ داکان مست دود آن تران کرسا بنجائی وزیر زرکاری چوہدری سالک حسین پارے کہ چینی کمپنی و بینک آک ہڑتوم آ ملک آتا اسیجائی تغ ءِ پورو کننگ کن پبی خواری اٹ کاریم کریر۔ سی پیک انفراسٹرکچر ناپوسکن آ دور اٹ پترینگ انگ ءِ۔ پاکستان اٹ چین نا ناظم الامور پینگ چنکسو دود آن تران کرسا پارے کہ پاکستان و چین سی پیک ءِ 10 سال پورو مننگ نا دود اڈتننگ ءُ۔ ہڑتوم آ ملک آتا الس نا شونہالی کن تین پہ تینی شریداری ءِ مون آ دننگ انگ ءِ۔ داوخت آ وزیراعظم محمد شہباز شریف سی پیک و شونداری کاریم تیٹی خذمت سرتروک آ چینی کمپنی و بینک آتا نمائندہ غاتیٹی ایوارڈ بشخا۔ داوخت آ بنجائی وزیر توانائی انجینئر خرم دستگیر، بنجائی وزیر زرکاری چوہدری سالک حسین، چینی ناظم الامور آن بیدس بڑزکوکمامدارآک ہم ساڑی ئسر۔
