لاہور۔ 07 اگست (اے پی پی) بنجائی وزیر پلاننگ اینڈ ڈویلپمنٹ احسن اقبال پارینے کہ امن و سوگوی و پالیسی تا چرجوئی ملکی شونداری کن بھاز المی ءِ، ملک نازرک حالیت آن گدرینگ انگءِ ، پنچ سال انا میوزیکل چیئر آن ملک ءِ شونداری نا کنڈا دننگ کینہ، داڑکن دہ سالہ پلاننگ آ پدریسہ کاریم کروئی مریک ، اسہ اناڑی اس ملکی زرگزران ءِ بھس کرے ، ہراتم نن اقتدار ءِ سنبھالان ہمووخت آ ملک انا ڈیفالٹ مننگ نا شڑت آتے خلنگاکہ، نن خواتہ زرگزران ءِ دُوارہ بحالی نا کسر آ شاغانن، ہراتم اسکان مسخت اسے کن امنائی سلاہ مف اسہ ڈٹ اسے ٹی ہم سرسہب ملنگ کپک، ننے اواری اٹ ملکی شونداری کن تینا کڑد ءِ اداکروئی مریک۔ دُوارہ موقع ملا تو ملک ءِ ایشین ٹائیگر جوڑ کننگ کن (ن) لیگ نا ڈٹ آتے برجاتخنہ، ہرا ملک ایٹمی طاقت جوڑ مننگ کیک او ہیپاٹائٹس ءِ ہم چٹفنگ کیک۔ سوب آتے پٹوئی مریک۔ او داخیال آتا درشانی ءِ دوشنبے نادے آ پی کے ایل آئی ٹی ہیپاٹائٹس سی چٹفنگ نا آگاہی مہم نا جہانی دے انا وخت آ اڈ ہلوک دود آن تران کرساکرے۔ بنجائی وزیر پلاننگ اینڈ ڈویلپمنٹ احسن اقبال پارے کہ بدبختی اٹ 75 سال آن مشکل حالیت آتیان گدرینگ انگ ءِ، انت سوب ءِ کہ ڈیہہ انا غٹ ملک آتیان پاکستان پدریسہ پدی ہِننگ ءِ۔ بھارت یا بنگلہ دیش اٹ ہرا انوکھا پلاننگ مسنے، جمہوریت نا چرجوئی اٹ ہی ملکی شونداری ممکن ءِ، اگہ مسہ گڑا امن، سوگوی و پالیسی تا چرجوئی ءِ ملک اسے ٹی ودی مرے تواو ملک شون ہلیک۔
