اسلام آباد۔ 07 اگست (اے پی پی) اسپیکر قومی اسمبلی راجہ پرویز اشرف و ڈپٹی اسپیکر قومی اسمبلی زاہد اکرم درانی ئسک میجر محمد طفیل شہید(نشانِ حیدر) ءِ خراج عقیدت پیش کرسا پارینو کہ پاک فوج انا آفیسر وورناک وطن نادفاع کن قربانی تا بے مٹ داستان اس نوشتہ کرینو۔ اوفک میجر طفیل شہید(نشانِ حیدر) نا 65 می برسی آ تینا کلہو اٹی پاریر کہ میجر محمد طفیل شہید (نشانِ حیدر) 1958اٹی بھارت تون سیم آ جھیڑہ ٹی جیرت و نرزوری نا داستان اس نوشتہ کرے او وطن نا دفاع نا خاطر جون ءِ ندر کرے و شہیدی نا عظیم مرتبہ غا فائز مس۔ مچ آ قوم ءِ میجر محمد طفیل شہید (نشانِ حیدر) نا شجاعت و نرزوری آ گمر ءِ۔ پاک فوج انا ورناک مدام ملک انا کنڈا خراب انگا نظر اٹ ہروک آتا جون ءِ پرواہ ءِ کننگ آن بیدس جیرت و نرزوری اٹ مقابلہ کریر و پاک فوج انا ورناک جیرت و نرزوری نا بے مٹ ءُ داستان اس نوشتہ کریر۔ مچ آ قوم میجر محمد طفیل شہید ءِ اونا بے مٹ قربانی تیا سلام پیش کیک۔ ڈپٹی اسپیکر پارے کہ مچ آقوم میجر محمد طفیل شہید(نشان حیدر) ءِ اونا 65 می برسی آ خراج عقیدت پیش کیک و اونا بے مٹ قربانی تے تاریخ اٹ مدام روشنا لوز آتیٹی یات تخنگک۔ پاک فوج ملک انا سلامتی و بقاء کن عظیم قربانی پیش کرینے ہراڑا نن گمر کینہ۔
