ای پورٹل مچ آ دنیا آن سیل و سواتی تا پاکستان اٹ است خواہی ءِ ودفنگ اٹ کمکار مریک، وزیراعظم شہباز شریف نا دود آن تران

اسلام آباد۔ 04 اگست (اے پی پی) وزیراعظم محمد شہباز شریف پارینے کہ پاکستان سیل وسواتی تیکن اسہ بے مثال ءُ ملک اسے، ای پورٹل مچ آ دنیا غان سیل و سواتی تا پاکستان اٹ است خواہی ءِ ودفنگ اٹ کمکار مریک، پاکستان اٹ بے شمار سیل وسواتی ہند آک ءُ  و خاص وڑاٹ ملک انا قطبی علاقہ غاتا قدرتی ندرارہ غاک بے مٹ ءُ، پاکستان قدرتی وسیلہ غاتیان شپ ءُ ملک اسے۔ داخیال آتا درشانی ءِ  وزیراعظم محمد شہباز شریف جمعہ نادے آ داڑے ’’سلام پاکستان‘‘ برانڈ و ای پورٹل نا بنائی دود آن تران کرساکرے۔ اوپارے کہ دود اٹی بشخ ہلنگ خوشی نا سوب ءِ، پاکستان اٹ سیل و سوات، دودوربیدگ و تاریخی میرات نا مون آ دننگ نا گیشتر وارخواہی دستیاب ءِ، ملک اٹی سیل وسوات نا بشخ انا شونداری و مون آ دننگ کن سلاہکار وزیراعظم عون چوہدری و اونا ٹیم انا کوشست آک قابل قدر ءُ، ایلم اسلامی ملک آتون اوار دنیا نا چندی ایلو ملک آک دودوربیدگ ، دستکاری  و سیل وسوات نا بشخ اٹی نمان شون ہلکنو، پاکستان ءِ اللہ تعالیٰ بے پناہ قدرتی وسیلہ و زیبا ءُ ندارہ تسنے خاص وڑاٹ ملک انا قطبی علاقہ غاتیٹی سیل وسواتی ہند آتے سیل و سوات نا مون آ دننگ کن کاریم اٹ اتنگ مریک۔ اوپارے کہ عون چوہدری نا سیل و سوات نا بشخ انا شونداری و پاکستان کن قابل قدر خذمت آک ءُ۔ وزیراعظم درملکی سفیر و سفارتی برادری نا دود اٹی بشخ ہلنگ نا ستاءِ کرسا دعاکرے کہ اللہ تعالیٰ ملک اٹ سیل و سوات ، دودوربیدگ، تاریخی میرات، و دستکاری نا بشخ انا شونداری کن ’’سلام پاکستان‘‘ برانڈ و ای پورٹل ءِ سرسہبی ایتے۔