وزیراعظم نا سلاہکار امور کشمیر و گلگت بلتستان نا انسٹی ٹیوٹ آف سٹریٹجک سٹڈیز اٹ سمینار آن تران

اسلام آباد۔ 04 اگست (اے پی پی) انسٹی ٹیوٹ آف سٹریٹجک سٹڈیز اٹی ’’5 اگست 2019 نا غیرکانودی بھارتی گام ، کشمیری تا حق و درستی راستی آ جلہو بلاروک ٹوک برجاءِ‘‘ نا سرحال آ جمعہ نا دے آ سیمینار اس اڈ ہلک۔ وزیراعظم نا سلاہکار امور کشمیر و گلگت بلتستان قمرزمان کائرہ دود اٹی مہمان خاص نا حیثیت اٹ بشخ ہلک۔ داوخت آ تران کرسا قمرزمان کائرہ پارے کہ کشمیریک حق خودارادیت کن بے مٹ قربانی تسنو، پاکستان کشمیری تا جہد آجوئی نا مخ تفی ءِ برجاتخک ، کشمیربارواٹی پاکستان نا موقف اٹ ہچ ءُ بدلی اس بتنے۔ اوپارے کہ جہانی برادری ءِ فائدہ غاتاجاگہ غا کشمیر نا ویل ءِ ایسر کننگ آ چکار کننگے۔ اوپارے کہ نن کشمیر نا ویل ءِ ولدا دنیا نا چکارنا مرکز کینہ۔ قمرزمان کائرہ پارے کہ نن پوسکن آ چین ءِ کشمیر نا ویل انا بارواٹی بایدے آگاہی ایتن۔ اوپارے کہ پاکستان پیپلزپارٹی نا بنداو ءِ کشمیر نا ویل آ تخنگا ، نن کشمیر نا ویل انا ایسری کن تینا جہد ءِ برجاتخنہ، پاکستان دا جھیڑہ ءِ جہانی کہول آ مدام تالان کرینے۔ اوپارے کہ کشمیر نا تحریک اسہ فکری تحریک اسے، دااسہ انسانی ویل اسے، پاکستان نا اسہ حکومت اس ہم داویل ءِ گوجالنگ کپک۔ اوپارے کہ 5 اگست 2019 نا بھارتی گام غیرکانودی ءِ ہرانا جہانی کانود نا رداٹ ہچ ءُ کانودی و اخلاقی حیثیت اس اف۔ دود آن مسکوہی سیکرٹری خارجہ و انسٹی ٹیوٹ آف سٹریٹجک سٹڈیز نا ڈائریکٹر جءنرل سہیل محمود، اوآئی سی نا آزاد مستقل انسانی حق کمیشن نا باسک مسکوہی سفیر تسنیم اسلم ، آزاد جموں وکشمیر نا مسکوہی  وزیر راجی آسودہی و زالبول فرزانہ یعقوب ، ایگزیکٹیو ڈائریکٹر ریسرچ سوسائٹی آف انٹرنیشنل لاجمال عزیز، چیئرمین کشمیر انسٹی ٹیوٹ آف انٹرنیشنل ریلیشنز الطاف حسین وانی، کل جماعتی حریت کانفرنس نا سینئر راہشون غلام محمد صفی، انسٹی ٹیوٹ آف سٹریٹجک سٹڈیز نا ڈائریکٹر ملک قاسم مصطفیٰ و ایلوترانکارآک تران کریر۔