قائد اعظم یونیورسٹی ٹی یانزدہ ءُ نیم ارب روپئی نا خڑچ انا مسہ ڈٹ آتا بنداو ءِ تخنگانے، ننے پاکستان ءِ مون آ دروئی ءِ، احسن اقبال

اسلام آباد۔ 04 اگست (اے پی پی) بنجائی وزیر ڈٹ بندی ، شونداری ، اصلاحات و خصوصی گام گیج پروفیسر احسن اقبال پارینے کہ قائد اعظم یونیورسٹی ٹی یانزدہ ءُ نیم ارب روپئی نا خڑچ انا مسہ ڈٹ  چائنا پاکستان جوائنٹ ریسرچ سینٹر ان ارتھ سائنسز، سینٹر آف ایکسی لینس فارسی پیک، ڈاکٹر اے کیو خان انسٹی ٹیوٹ آف میٹریل اینڈ ایمرجنگ سائنسز نا بنداو ءِ تخنگانے، ننے پاکستان ءِ مون آ دروئی ءِ، نن 75 سال زیان کرینن۔ داخیال آتا درشانی ءِ او ہندا ڈٹ آتا بابت اڈ ہلوک دود اٹی بطور مہمان خاص شریک گپ وتران کرسا کرے۔ اوپارے کہ قائد اعظم یونیورسٹی ٹی یانزدہ ءُ نیم ارب روپئی نا خڑچ انا مسہ ڈٹ آتا بنداو ءِ تخنگانے۔ اوپارے کہ سی ڈی ڈبلیو پی تدوک آ دے مسہ ڈٹ آتا منظوری ءِ تسنے۔ اوخت آ قائد اعظم یونیورسٹی نا وائس چانسلر ڈاکٹر نیاز علی اختر پارے کہ بنجائی وزیر پروفیسر احسن اقبال نا کوشست آتا سوب آن دا ڈٹ ننے ملانے۔ بنجائی حکومت تدوک آ دے قائد اعظم یونیورسٹی نا اسکول آف اکنامکس نا ہم منظوری ءِ تسنے۔ داوخت آ بنجائی وزیر احسن اقبال پارے کہ وخت انا قلت نا سوب آن نن داڑے اینو اسہ جاگہ غا مسہ ڈٹ آتیکن یکجا مسونن۔ دا ڈٹ آک چار سال آن التوانا گواچی ئسر۔ شونداری کن قوم تے سنجیدگی و چرجوئی اٹ کاریم کروئی تمک۔ اوپارے کہ 2013ٹی دا ملک اٹی بجلی الوکہ، نن مخ ءِ تفین وژن 2025 ءِ ایسون۔ ہمووخت انا چندی بقراط و سقراط ننے آ مخارہ۔ اللہ سی پیک نا دروشم اٹ کمک مون تس۔ اوپارے کہ 5 جولائی 2013آ چین اٹی سی پیک سائن مس تو چنکو وخت اسے ٹی 46 ارب نا ڈٹ آتا پلاننگ پورو ئس۔ چین نا صدر پاکستان بننگ خواہس تو اسہ سیاسی جماعت اس ریڈزون اٹ راگ اس خلکوسس۔ ہشت تُو آن پد دا ڈٹ آتا بنداو ءِ تخنگا تو وال سٹریٹ جرنل دنیا ءِ مستائی تس۔ اوپارے کہ پاکستان اٹ سعودی عرب و ایران نا آئل انرجی نا مقابلہ ٹی تھرکوئل کوڑی ساڑی ءِ۔ سی پیک نا سوب اینو تھرکوئل کوڑی اڑزان انگا بجلی ودی کننگ نا ذریعہ جوڑ مسنے۔ اوپارےکہ حکومت بدل مس تو سی پیک نا رفتار ہم بدل مس۔ سی پیک نا غٹ  ڈٹ آتیٹی غٹ خڑچ آتے چین تینا دوتے اٹ کرینے ولے تدوک آدور ءِ حکومت اٹ ولدا ہم کرپشن نا دوبہ غاتے خلنگا۔ 2017-18ٹی کنے آ امریکہ برطانیہ و فرانس نا سفیر برسا سی پیک اٹ تینا کمپنی تے اوار تخنگ نا سفارش کریرہ۔ دنیا ٹی اسہ قوم اس ہم ہمووخت اسکان شون ہلتو ہراتم اسکان او پالیسی تا چرجوئی ءِ تینا کتو۔ اوپارے کہ پاکستان چاگڑدی بدلی تا منفی اثرآتون مون تننگ ءِ۔ چین نا ارتھ سائنسز اٹی کمکاری ءِ قدر انا نظر اٹ ہرنہ۔ چین نا نائب وزیراعظم ساڑی آ دورہ ءِ پاکستان اٹی سی پیک نا بطن آن پنچ پوسکن کوریڈور نا نوید بنفینے۔ یونیورسٹی 8 و5 انا نظام آ چلینگپسہ، ننے ایکو سسٹم  ءِ ودی کروئی ءِ۔ ننے پاکستان ءِ مون آ دروئی ءِ۔ نن 75 سال زیان کرینن۔ ننے طے کروئی ءِ کہ پاکستان ہراتم سد سال انا مرے تو نن ہراڑے سلوک مرین۔