وزارت حوالکاری و اسٹیٹ لائف انشورنس نانیام اٹ صحافی ، میڈیا ورکر، فنکار و فلمی صنعت نا تکنیکی چاہندار آتے جان جوڑی کارڈ تننگ نا معاہدہ غا دستخط مس، وزیراعظم شہباز شریف و بنجائی وزیر حوالکاری نا دود اٹی خصوصی شرکت

اسلام آباد۔ 03 اگست (اے پی پی) وزارت حوالکاری و اسٹیٹ لائف انشورنس کارپوریشن نا نیام اٹ صحافی، میڈیا ورکر، فنکار و فلمی صنعت نا تکنیکی چاہندار آتے جان جوڑی کارڈ تننگ نا معاہدہ غا دستخط مس ۔ مفاہمتی یات داشت آ دستخط آتا دود پنچ شنبے نادے آ اڈ ہلک ہراٹی وزیراعظم شہباز شریف و بنجائی وزیر حوالکاری مریم اورنگزیب خصوصی بشخ ہلکر۔ صحافی ومیڈیا ورکرآتا ہیلتھ انشورنس کن مفاہمت نا یات داشت آ پرنسپل انفارمیشن آفیسر مبشرحسن و ایگزیکٹیو ڈائریکٹر سٹیٹ لائف انشورنس کارپوریشن  شاہد اقبال ئسک دستخط کریر وخت اس کہ فنکار و تکنیکی چاہندار آتا ہیلتھ انشورنس نا معاہدہ غا ڈائریکٹر جنرل الیکٹرانک میڈیا اینڈ پبلی کیشنز ثمینہ فرزین و ڈویژنل ڈائریکٹر سٹیٹ لائف انشورنس محمد اشعر دستخط کریر۔ داوخت آ وزیراعظم شہباز شریف، بنجائی وزیر حوالکاری وشینکاری مریم اورنگزیب، وزیرکانود اعظم نذیر تارڑ ، وزیراعظم نا کوآرڈینیٹر زرگزران و توانائی بلال اظہر کیانی، سیکرٹری حوالکاری سہیل علی خان، چیئرمین سٹیٹ لائف شعیب جاوید ئسک ہم ساڑی ئسر۔ دود اٹی وزارت حوالکاری و شینکاری و اسٹیٹ لائف انشورنس نا بڑزکو کمامدارآتون اوار شرفمند آ مہمانک بشخ ہلکر