وزیراعظم شہباز شریف نا بھارہ کہو بائی پاس نا بناء نا دود آن تران

اسلام آباد۔ 03 اگست (اے پی پی) وزیراعظم محمد شہباز شریف پارینے کہ وخت بسنے کہ نن غٹ اواری اٹ قومی یکجہتی ، امنائی سلاہ و سلابت اٹ پاکستان ءِ شونداری نا کنڈا دین، ملک و قوم انا شونداری و شونہالی کن مشکل فیصلہ کروئی تمک، مستین اٹ ننا حکومت ءِ چٹفنگتوکہ تو ملکی شونداری نا ڈٹ پورو مسورہ، بھارہ کہو ڈٹ آن الس ءِ بھاز آسراتی مریک، ساڑی سپہ سالار ملکی شونداری و الس نا راجی آسودہی کن ہروخت تیار سلرہ، بھارہ کہو ڈٹ 9 تُو انا گونڈ مد اٹی غٹ تر مشکل آتیان پد ہم پورو مس۔ داخیال آتا درشانی ءِ او پنچ شنبے نادے آ داڑے بھارہ کہو بائی پاس ڈٹ انا بنائی دود آن تران کرسا کرے۔ دوداٹی بنجائی وزیر حوالکاری و شینکاری مریم اورنگزیب، مسکوہی وزیر ڈاکٹر طارق فضل چوہدری، مسلم لیگ (ن) نا راہشون حنیف عباسی ، ملک ابرار، انجم عقیل خان، ڈی جی این ایل سی میجر جنرل فرخ، چیئرمین سی ڈی اے نورالامین مینگل آن بیدس بڑزکو کمامدار و الس نا بھلو کچ اس ساڑی ئسر۔ وزیراعظم پارے کہ اینو وخت ءِ کہ  نن غٹ اواری اٹ پاکستان ءِ مون آ دین۔ مشکل آک ساڑی ءُ، بریرہ ولے اللہ تعالیٰ نا کرم اٹ غٹ مننگ کیک۔ وزیراعظم پارے کہ ہراتم قوم اس فیصلہ کے کہ ننے تقدیر ءِ بدل کروئی ءِ تو خداہم کمک کیک و دا مننگ کیک۔ وزیراعظم مستی پارے کہ اینو کنے نمتون داہیت ءِ کروئی ئسک کہ نن فیصلہ کین کہ نن اواری اٹ سلابت اٹ ملک انا فائدہ ٹی کاریم کینہ۔ قومی یکجہتی ، سلابت و قومی امنائی اٹ شون ہلینہ۔ فریشان مننگ نا ضرورت اف اگہ نن فیصلہ کین تو منہ سال اٹی نن ہمو کہول آ مرینہ ہراڑے 1990 نا دہائی ٹی پاکستان سرمسوسس۔ دود آن تران کرسا مسکوہی بنجائی وزیر ومسلم لیگ (ن) نا راہشون ڈاکٹر طارق فضل چوہدری پارے کہ تدوک آ 15 تُو اٹی اخس شونداری اسلام آباد و مچ آ ملک اٹی مس خداگواہ ءِ  کہ ہنداخہ شونداری مستین اٹ متنے۔ اوپارے کہ وزیراعظم محمد شہبازشریف نا کماشی ٹی داوخت آریکارڈ ڈٹ آتے پورو کننگا۔ اوڈٹ انا پوروی کن وزیراعظم نا ذاتی است خواہی آ الس ناکنڈآن اظہار تشکر کرسا پارینے کہ اسلام آباداٹی 50 درسد آبادی خلقی علاقہ غاتیٹی ءِ۔ مستین اٹ شونداری ڈٹ خلقی علاقہ غاتیٹی متوکہ ولے شار انا تاریخ اٹ اولیکو وار 200 ارب روپئی نا ڈٹ آتا بناءِ کننگا ہرافتیان 90 درسد پورو کننگا۔ اوپارے کہ داکان مست سی ڈی اے رورل ایریہ غاتیا چکار کتنے۔ اوپارے کہ وزیراعظم نا پارت و چیئرمین سی ڈی اے نا کوشست آتیٹی خلقی علاقہ غاتیٹی ارب آ روپئی نا ڈٹ آتے پورو کننگ انگ ءِ۔ دود آن تران کرسا چیف کمشنر اسلام آباد و چیئرمین سی ڈی اے نورالامین مینگل پارے کہ اسلام آباد نا خلقی علاقہ غاتیٹی 20 ارب روپئی نا شونداری ڈٹ آتے پورو کننگ انگ ءِ ہرافتے ٹی پارک، سڑک آتا تفنگ آن بیدس ایلو ڈٹ آک ہم اوار ءُ۔ اوپارے کہ اولیکو وار وسیلہ و آسراتی تا رُخ بنجائی دارالحکومت نا خلقی علاقہ غاتا کنڈا کننگ انگ ءِ۔ دوداٹی نورالامین مینگل اسلام آباد اٹی چندی شونداری آتیان بیدس  چاگڑد نا بشخ انا گچینی و السی آسراتی تا ودکی کن سی ڈی اے نا گام گیج آتے مون آ تخا۔