لیپ ٹاپ  و وام اسکیم آن ہُشار نیزگار طالب علم آک فائدہ ہرفرہ، وزیراعظم نا ڈیجیٹل یوتھ ہب پورٹل نا بنائی دود آن تران

اسلام آباد۔ 03 اگست (اے پی پی) وزیراعظم محمد شہباز شریف ملک ءِ عظیم تر و ورناتے واکدار کننگ نا عزم انا درشانی ءِ کرسا پارینے کہ لیپ ٹاپ و وام اسکیم آن ہُشار نیزگار طالب علم آک فائدہ ہرفرہ، یوتھ پروگرام نا کمک اٹ داتم اسکان 30 ارب روپئی بشخنگانے، پاکستان ایجوکیشن انڈوومنٹ فنڈ اکن 5 ارب روپئی جتا کرینے، دُوارہ گچین مسن تو ورناتیکن جتا کروک زر ءِ پین ودفنہ۔ داخیال آتا درشانی ءِ او پنچ شنبے نادے آ داڑے ڈیجیٹل یوتھ ہب پورٹل نا بنائی دود آن تران کرسا کرے۔ وزیراعظم پارے کہ وزیراعظم یوتھ پروگرام ءِ مچ آ ملک اٹی ترند رفتاری اٹ تالان کننگ اُن۔ ای پشاور، کراچی، لاہور، گوادر نا دورہ ءِ کرینٹ، ملک انا ہُشار طالب علم آتے میرٹ آ لیپ ٹاپ تننگ انگ ءِ۔ یوتھ پروگرام آن کاروبار ، کشت وکشار و ایس ایم ایز کن وام تا مد اٹی داتم اسکان 30 ارب روپئی بینک آتا کمک اٹ بشخنگانے۔ یوتھ اسپورٹس پروگرام کن بجٹ اٹ 5 ارب روپئی جتا کننگانے۔ آئی ٹی پروگرام، فری لانسرز، فنی تربیت و ایلو بشخ آتیکن جم وڑاٹ بجٹ اٹ 80 ارب روپئی جتا کننگانے۔ ورناتے کاروبار کن وام تا مد اٹی 5 ارب روپئی نا زر تخانے۔ وظیفہ غاتیکن ہم 5 ارب روپئی جتا کننگانے۔ اوپارے کہ 2008اتی پنجاب ایجوکیشن انڈوومنٹ فنڈ ءِ نن جوڑ کریسن و 10 سال اٹی ہشار طالب علم آتیٹی 22 ارب روپئی نا وظیفہ غاتے بشخان ہرافتیان 4 لکھ آن زیات ہُشار طالب علم آک فائدہ ہرفیر۔ داسہ بنجا نا کہول آ پاکستان ایجوکیشن انڈوومنٹ فنڈ اس جوڑ کننگاہراڑکن 5 ارب روپئی تخانن و دازر ءِ ہُشار طالب علم آتیٹی بشخنگک۔ وزیراعظم پارے کہ کنا وس چلینگے تو 5 ارب روپئی نا دازر ءِ ودفسا 500 ارب روپئی کیو۔ ورناک دا پورٹل نا کمک اٹ تینے رجسٹرڈ کرفنگ کیرہ۔ لیپ ٹاپ اسکیم سرکاری تعلیمی ادارہ غاتا نیزگار طالب علم آتیکن ءِ۔ پرائیویٹ تعلیمی اارہ غاتا طالب علم آتیکن اف انتئے کہ او بھلو فیس اس  تننگ کیرہ تو لیپ ٹاپ ہم ہلنگ کیرہ۔ لیپ ٹاپ و وام اسکیم آن نیزگار طالب علم آک فائدہ ہرفرہ۔ اوپارے کہ نن دُوارہ گچین مسن تو ورناتیکن جتا زر اٹی ودکی کینہ۔ ورناتے واکدار کننگ کن غٹ تر گام گیج آتے کننگک۔ نن اواری اٹ ملک ءِ عظیم جوڑ کینہ۔