پاکستانی سفیر نا اقتصادی شونداری، توانائی و چاگڑدنا امریکی انڈرسیکرٹری تون اوڑدہی

واشنگٹن۔ 03 اگست (اے پی پی) امریکہ ٹی پاکستان نا سفیر مسعود خان اقتصادی شونداری، توانائی و چاگڑد نا امریکی انڈر سیکرٹری جوز ڈبلیو فرنینڈس تون اوڑدہی کرے و ہڑتوم آ ملک آتا نیام اٹ اقتصادی تعلقداری تے سوگو کننگ کن گام گیج آتا بارواٹی گپ وتران کرے۔ امریکی انڈر سیکرٹری ٹویٹ اٹی پارے کہ او پاکستانی سفیر مسعود خان تون پاک امریکہ اقتصادی شریداری ءِ سوگو کننگ و یوایس پاکستان گرین الائنس نا کمک اٹ چاگڑدی بدلی نا منفی اثرآتا برخلاف مزاحمت نا گام گیج و ٹیکنالوجی نا بشخ اٹی زرکاری نا بارواٹی گپ وتران کرے۔ اوپارے کہ او تین پہ تینی فائدہ مند اولیت آتیا اواری اٹ کاریم کننگ نا چاری ءُ۔ پاکستانی سفارت خانہ نا کنڈآن جاری بیان نا رداٹ سفیر گرم جوشی اٹ بیابخیری آ جوز ڈبلیو فرنینڈس نا منت واری ءِ ہرفے۔ اوتینا ٹویٹ ٹی  پارے کہ پاکستان و امریکہ اواری اٹ واپار، ٹیکنالوجی  ، کشت وکشار، توانائی و چاگڑدی بدلی نا منفی اثرآتا برخلاف مزاحمت تخوک آ گام گیج آتیٹی تین پہ تینی کمکاری نا مون آ دننگ کن کاریم کیرہ۔ اواومیت ظاہر کرے کہ پاکستان کن امریکہ غان براہ راست درملکی زرکاری (ایف ڈی آئی ) راغب مریک۔