وزیراعظم شہباز شریف نا ترکیہ ءِ سی پیک اٹی اوار مننگ  نا سلہ، ملجم کلاس کارویٹ ڈٹ پاکستان  و ترکیہ  نا خڑکی تعلقداری نا جوان ءُ درور اسے، دود آن تران

کراچی۔ 02 اگست (اے پی پی) وزیراعظم محمد شہباز شریف پاکستان و ترکیہ نا نیام اٹ دفاع تون اوار چندی بشخ آتیٹی تعلقداری تے ودفنگ و ترکیہ ءِ سی پیک اٹ اوارمننگ نا سلہ خلسا پارینے کہ سی پیک اسہ گیم چینجر ڈٹ اسے ہراڑا ترندی نا کاریم  مننگ ءِ، وخت اناخواست ءِ کہ پاکستان و ترکیہ سٹریٹجک کمکاری ءِ پین ودفر، ملجم کلاس کورویٹ ڈٹ ہڑتوم آ ملک آتا خڑکی تعلقداری نا عمدہ ءُ درور اسے، حکومت پاک بحریہ نا دفاعی گرج آتے پورو کننگ کن غٹ گام گیج آتے کیک۔ داخیال آتا درشانی ءِ او چارشنبے نادے آ داڑے پی این ایس طارق ملجم  کلاس کارویٹ جنگی جہاز ءِ پاک بحریہ نا بیڑہ ٹی اوار کننگ نا دود آن تران کرسا کرے۔ داوخت آ ترک نائب صدر جودت یلماز مہمان اعزاز ئسک۔ دود اٹی وزیرخارجہ بلاول بھٹو زرداری، بنجائی وزیر ڈٹ بندی احسن اقبال ، بنجائی وزیر واپار سید نوید قمر، وزیراعلیٰ سندھ مراد علی، گورنر سندھ کامران ٹیسوری، پاک بحریہ نا سروک ایڈمرل امجد نیازی تون اوار بڑزکوسول و فوجی کمامدارآک بشخ ہلکر۔ وزیراعظم پارے کہ پاکستان و ترکیہ ہڑتوم آ کنڈآتا تعلقداری تاریخی و سوگو بنداوتیا جوڑ ءِ و ہڑتوم آملک آک کڑمب، تاریخی ، و مذہبی رشتہ غاتیٹی گنڈوک ءُ۔ ننا میرات و تہذیب اسٹ ءِ۔ چندی علاقائی و جہانی امور تیا ہڑتوم آ ملک آتا خیال آک اسہ وڑ ءُ۔ پاکستان نا جوڑ مننگ نا وخت آ پاکستان نا الس تحریک خلاف نا پبی مخ تفی ءِ کرے۔ پی این ایس طارق نا لانچنگ آ غٹ تعلقدار بندغ آتے مبارکبادی ایتیوہ۔ دا چارمیکو بحری جہاز ءِ ہرا پاکستان و ترکیہ اواری اٹ تیار کرینو۔ 2010اٹی پاکستان اٹ ہراتم نوکاپ بس تو ترکیہ نا صدر رجب طیب اردوان پاکستان نا دورہ ءِ کرے۔ داڑے رجب طیب اردوان ہسپتال و اونا اُرائی نا پن آ اسکول تفنگا۔ زمی  جمب و ایلو قدرتی آفت آتیٹی ترکیہ تینا پاکستانی ایلم تا پبی کمک ءِ کرے۔ ہڑتوم آ ملک آک اسہ ایلو نا ڈکھیائی ٹی شریک ءُ۔ پاکستان و ترکیہ نا سنگتی و ایلمی مثالی ءِ۔ پاکستان وترکیہ ملجم کلاس کارویٹ ڈٹ ہڑتوم آ ملک آتا خڑکی تعلقداری نا عمدہ درور ءِ۔ دا ڈٹ ہم ہڑتوم آ ملک آتا تعلقداری تے پین سوگو کیک۔ ہڑتوم آ ملک آتا شونہالی نا سفر ہندا وڑ برجاسلک۔ صدر طیب اردوان ترک الس نا پبی خذمت ءِ کرینے واو تینا الس نا آسودہی کن بے پناہ کاریم کننگ ءِ ہرانا ڈیک ساڑی آ صدارتی گچین کاری تا بھرم آتیان مسنے۔ وزیراعظم پارے کہ کراچی پورٹ و گوادر پورٹ ءِ اسہ ایلو تون ملفنگ کن گام گیج کننگ انگ ءِ۔ سی پیک دا چرجوئی ٹی بھاز اہمیت تخک ہرانا نن ارٹ میکو ریسہ ٹی پترینگ انگ اُن۔ ہرانا رداٹ گرین کوریڈور، بزنس کوریڈور، اکنامک زون کوریڈور و انفارمیشن ٹیکنالوجی کوریڈور زون جوڑ کننگگ۔ نن صدر طیب اردوان تون ہم داڑا ہیت کرینن و داسلہ ءِ پوسکن کینہ کہ ترکی ہم اسیجائی شونداری و شونہالی نا دا ڈٹ اٹ اوار مرے۔ گوادر ءِ نن  اسہ اہم واپاری مرکز اس جوڑ کروئی ءِ۔ سی پیک اسہ گیم چینجر ڈٹ اسے  ہراڑا ترندی اٹ کاریم مننگ ءِ۔ وزیراعظم پارے کہ وخت انا خواست ءِ کہ پاکستان ترکی سٹریٹجک کمکاری ءِ پین مون آ دے۔ ملک انا الس و غٹ تعلقدار فریق آتا کنڈآن دا ڈٹ ءِ سرسہب کروک آتا کوشست آتا ستاءِ کینہ، و تاریخ دا خواری ءِ مدام یات تخک۔ ننا بری، بحری وفضائی سیم تے رکھ کننگ اٹ کارندہ و چاہندار آتا کوشست آتے مدام یات تخنگک واودے روشنا لوز آتیٹی نوشتہ کننگک۔ وزیراعظم پارے کہ حکومت پاک بحریہ نا دفاعی گرج آتے پورو کننگ کن غٹ گام گیج آتے کیک۔ وزیراعظم ملجم کلاس کارویٹ نا تیاری ٹی بشخ ہلوک آ کارندہ و چاہندار آتیکن 20 کروڑ روپئی نا پڑو کرے و پارے کہ ننے تدوک آ اسہ سال اٹی بھاز مالی چیلنج مون تروک مسنے و دانا غٹ آن زیات بھاریم ملک انا الس آ تمانے۔ پیشن نا کساد بازاری، تیل انا درآمد، کبینی و گڑاتا نہاد آتیٹی ودکی دانا بنداوی سوب ءُ، ولے دا ڈٹ اٹی بشخ ہلوک آ کارندہ و چاہندار آتا کوشست ءِ امنا کرسا اوفتا حوصلہ  ءِ ودفنگ کن مالی مشکل آتیان پد ہم اوفتے کن 20 کروڑ روپئی نا ٹیکی اس ایسونٹ۔ نم پاکستان نا عظیم جوڑکروک آکورے، کنے یقین ءِ کہ دا20 کروڑ روپئی ءِ انصاف اٹ دا ڈٹ انا کارندہ و چاہندار آتیٹی بشخنگک۔ دود آن تران کرسا پاک بحریہ نا سروک ایڈمرل امجد نیازی پارے کہ ہڑتوم آ ملک آتا مشکل وخت اٹی مدام اسہ ایلو تون تفینو۔ پی این ایس طارق نا لانچنگ آ انجینئر و چاہندار آتے مبارکبادی ایتیوہ۔ دود آن کراچی شپ یارڈ انا منیجنگ ڈائریکٹر ایڈمرل سلمان الیاس ہم تران کرے۔ دود انا ایسر آ پاک بحریہ نا سروک ایڈمرل محمد امجد خان نیازی وزیراعظم محمد شہباز شریف و ترکیہ نا نائب صدر جودت یلماز جنگی بحری جہاز پی این ایس طارق نا ماڈل اس پیش کرے۔