ترکیہ نا شریداری اٹ تیارکروک پی این ایس طارق پاک بحریہ ٹی اوار، وزیراعظم شہباز شریف ترکیہ نا نائب صدر جودت یلماز تون اوار لانچنگ کرے

کراچی۔ 02 اگست (اے پی پی) پاکستان و ترکیہ نا تین پہ تینی شریداری اٹ تیار مروک آ ملجم کلاس جنگی بحری جہاز پی این ایس طارق پاک بحریہ نا زمواری تیٹی اوار مس۔ داوخت آ سے شنبے نادے آ کراچی شپ یارڈ اٹی اڈ ہلوک خصوصی دود اٹی وزیراعظم محمد شہباز شریف و ترکیہ نا نائب صدر جودت یلماز ئسک بشخ ہلکر۔ ترکیہ نا نائب صدر جودت یلماز دود انا مہمان اعزاز ئس۔ دود اٹی وزیرخارجہ بلاول بھٹو زرداری، بنجائی وزیر ڈٹ بندی احسن اقبال ، بنجائی وزیر واپار سید نوید قمر، وزیراعلیٰ سندھ مراد علی، گورنر سندھ کامران ٹیسوری، پاک بحریہ نا سروک ایڈمرل امجد نیازی تون اوار بڑزکو سول و فوجی کمامدارآک بشخ ہلکر۔ وزیراعظم محمد شہباز شریف ترکیہ نا نائب صدر تون اوار پی این ایس طارق نا لانچنگ کرے۔ پی این ایس طارق ملجم کلا س کارویٹ جنگی جہاز ہمو چار بحری جہاز آتیان اسٹ ءِ، ہراترکیہ تون ٹیکنالوجی نا گدریفنگ نا معاہدہ نا رداٹ ترک و پاکستانی انجینئر اواری اٹ جوڑ کننگ ءُ۔ 2018 ٹی پاک بحریہ و ترکیہ نا نیام اٹ 4 جنگی بحری جہاز آتا تیاری نا معاہدہ مسوسس۔ معاہدہ نا رداٹ 2 جہاز ترکیہ و 2 جہاز پاکستان اٹ تیار کننگ انگ ءِ۔ داکان مست 3 جہاز آتا لانچنگ مسنے و او پوروی نا جتا ریسہ غاتیٹی ءُ۔ پی این ایس طارق پاکستان اٹی تیار مروک آ ارٹ میکو بحری جنگی جہاز ءِ۔ داکان مست وزیراعظم ءِ جہاز نا تیاری نا بابت حوال تننگا۔