صدر مملکت ڈاکٹر عارف علوی تون کامسٹیک نوبیل فیسٹیول نا انتظامی ڈل انا اوڑدہی

اسلام آباد۔ 02 اگست (اے پی پی) صدر مملکت ڈاکٹر عارف علوی تون کامسٹیک نوبیل فیسٹیول نا انتظامی ڈل اوڑدہی کرے۔ اوڑدہی ٹی پاکستان اٹی قازقستان نا سفیر یرزہان کسٹافن ہم ساڑی ئسک۔ انتظامی کمیٹی صدر مملکت ءِ قازقستان اٹ نوبیل فیسٹیول نا گرج و مسخت آتا بارواٹی حوال تس۔ ایوان صدر نا پریس ونگ انا رداٹ صدر مملکت ءِ حوال اٹی پاننگاکہ نوبیل فیسٹیول نا مسخت ہراسٹ نا تعلیم و سائنس اسکان رسینگ ءِ آسان کننگ ءِ، نوبیل فیسٹیول اٹ نوبیل انعام یافتہ بندغ، سائنسدان و جہانی ادارہ غا ک بشخ ہلیرہ۔ صدر مملکت اسلامی ملک آتا نیام اٹ سائنس، ٹیکنالوجی و جدت طرازی نا بشخ آتیٹی کمکاری ءِ ودفنگ نا گرج آ زور شاغا۔ داوخت آ قازقستان نا سفیر پارے کہ پاکستان تون تعلیم نا بشخ اٹی کمکاری ءِ خاص اہمیت ایتنہ، پاکستان و قازقستان نا نیام اٹ براہ راست فضائی رابطہ نا مننگ ستاکڑزک۔ صدر مملکت سائنس و ٹیکنالوجی نا پڑاٹ اسلامی ملک آتا نیام اٹ کمکاری ءِ ودفنگ کن کامسٹیک نا کوشست آتا ستاءِ کرے۔