نگران سیٹ اپ کن سلابت برجاءِ، حکومت چٹنگ آن مست اِرامسہ دے اسکان باندات ایسر مریک، احسن اقبال

اسلام آباد ۔ 02 اگست (اے پی پی) بنجائی وزیر ڈٹ بندی  شونداری، اصلاحات وخصوصی گام گیج احسن اقبال پارینے کہ الیکشن آن فرار ہچ ءُ دروشم اسے ٹی ممکن اف، نگران سیٹ اپ کن سلابت نا عمل برجا، الیکشن کمیشن گچین کاری تا شیڈول نا پڑو ءِ کیک، صوبہ غاتا کنڈآن مردم شماری آ سست رفتاری اٹ کاریم مس۔ داخیال آتا درشانی ءِ او میڈیا تون گپ وتران کرسا کرے۔ اوپارے کہ گچین کاری تا اڈتننگ کن گڈیکو اتھارٹی الیکشن کمیشن ءِ، 2018 نا گچین کاری تا وخت آ ہم ہندا وڑ نا ویل مون تروک ئسک۔ اوپارے کہ داوخت آ مون تروک ویل ءِ الیکشن کمیشن ءِ آئین ءِ مون آ تخسا ایسر کروئی ءِ۔ الیکشن آن فرار ہچءُ دروشم اسے ٹی ممکن اف ، دا ننا ملک انا گرج ءِ۔ نگران سیٹ اپ بریک، اوکان پد الیکشن کمیشن گچین کاری تا شیڈول نا پڑو ءِ کیک ۔ اوپارے کہ صوبہ غاتا کنڈآن وار وار آ وخت خواہنگ آ مردم شماری ٹی تاخیر مس۔ صوبہ غاتے مردم شماری کن پین وخت تتونہ تو صوبہ غاک گلہ کریرہ۔ نگران حکومت اخس کہ قابل مرے بے یقینی نا تاثر سلک۔ مون نا ریسہ غاتا فیصلہ ءِ الیکشن کمیشن آئین نا رداٹ کیک۔ اوپارے کہ نگران سیٹ اپ کن سلابت نا عمل برجاءِ۔ حکومت چٹنگ آن مست اِرا مسہ دے اسکان باندات ایسر مریک۔ حکومت تون پنچ سال انا مینڈیٹ مرے تو اصلاحات کننگ کیک۔