بشام نا پِرتیٹی دریاتیٹی دِیر انا بہاؤ ٹی ودکی و نوکاپی حالیت ودی مننگ نا گڑتی ءِ، این ڈی ایم اے

اسلام آباد۔ 02 اگست (اے پی پی) ملک انا چندی علاقہ غاتیٹی بشام نا پِر و اونا نتیجہ ٹی دریاو جل تیٹی دِیر انا بہاؤ ٹی ودکی و مش و دامان تیٹی نوکاپی حالیت ودی مننگ نا گڑتی ظاہر کننگانے، نیشنل ڈیزاسٹر مینجمنٹ اتھارٹی گمانی خطرہ غاتا توننگ کن ایڈوائزری جاری کرے۔ این ڈی ایم اے نا بشام اپڈیٹ نا رداٹ دریائے سندھ (گدو، سکھر) نا ہند آ نیامی درجہ نا نوکاپ برجاسلنگ نا گمان ءِ۔ خیبرپختونخوا ، قطبی پنجاب، گلگت بلتستان، کشمیر و اسلام آباد اٹی ترند تہو و ہورہ و گروک اٹ پِر انا گمان ءِ ۔ خیبرپختونخوا(چترال، دیر ، سوات، کوہستان، شانگلہ، بونیر، مانسہرہ ، ایبٹ آباد) ، پنجاب(راولپنڈی) ، گلگت بلتستان، آزاد کشمیر و اسلام آباد نا ندی نالہ غاتیٹی بہاؤ ٹی ودکی نا گمان ءِ۔ ہندا وڑ گلگت بلتستان نا دریا و ندی نالہ غاتیٹی بہاؤ ٹی ودکی و مشی آ دامان تیٹی برفانی جھیل آتیان نوکاپی حالیت ودی مننگ کون آ واقعہ غاتا ہم گمان ءِ۔ این ڈی ایم اے نا ایڈوائزری ٹی پاننگانے کہ ممکنہ خطرہ غاتا توننگ کن الس نا پشگی حوال و رکھی گام گیج آتا تشہیر و حساس علاقہ غاتا کنڈا ٹریفک نا منظم چاروکی ءِ کننگے۔ ہلہلہ ئی حالیت آتون مون تننگ کن مشینری ءِ تیارتخر، نشبی علاقہ غاتیٹی رہینگوک آ مخلوق نا ہمپنگ کن بست وبند کننگے۔