اسلام آباد۔ 01 اگست (اے پی پی) وزیراعظم محمد شہباز شریف پارینے کہ جنگ ہچ ءُ ویل اسے نا ایسراف، جھیڑہ غاتا پرامن ایسری آ یخین تخنہ، گپ وتران اٹ ہی مون آ ہِننگ مریک، ریکوڈک ڈٹ بھاز اہمیت تخک، پاکستان اٹ 6 ٹریلین ڈالر نا معدنی کوڑی ساڑی ءِ، 75 سال اٹی نن تینا قیمتی دولت آ چکار کتون، کرپشن ہم دا بشخ انا شونداری ٹی بھلو اڑاند اس ئسک، مستین اٹ نیب کاروباری شخصیت آتے زیزاریفے ولے کرپٹ مخلوق نا کرپشن ءِ گوجالنگا، ایس آئی ایف سی پاکستان نا شونداری نا گچین ءُ ماڈل اسے، تینا وسیلہ غاتے السی آسودہی آ خڑچ کروئی مریک، ننے شونداری نا رُمب ایلوفتیان مو ن آ ہنوئی ءِ۔ داخیال آتا درشانی ءِ سے شنبے نادے آ او پاکستان منرل سمٹ (ڈسٹ ٹوڈویلپمنٹ) نا بنائی سیشن آن تران کرسا کرے۔ وزیراعظم پارے کہ ننکن اینو اسہ اہم ءُ دے اسے، داڑے جتا زند انا بشخ آتیان تعلق تخوک آ زرکار و ایلو بندغ آک ساڑی ءُ۔ ریکوڈک ڈٹ ملکی تاریخ اٹ خاص اہمیت تخک۔ تدوک آ 75 سال اٹی نن تینا قیمتی دولت آ چکار کتون، وزیراعظم پارے کہ پاکستان اٹ 6 ٹریلین ڈالر نا کوڑی ساڑی ءِ و داسکان ہرن تو نن ہراڑے سلوک اُن۔ پاکستان اسٹیل مل 70 نادہائی ٹی روس انا شریداری اٹ تفنگا و اونا غٹ خام مال ءِ درآمد کرسا کننگا۔ کالا باغ اٹ این انا کوڑی اسکان رسینگ دوئی کننگا ولے اوفتے گیرام کننگا۔ دادے اینو نا دور انا ٹیکنالوجی نا کمک اٹ دا اسٹیل مل انا خام مال اکن کاریم اٹ اتنگ مریک۔ اوپارے کہ ریکوڈک اٹ پاکستان آ 10 ارب ڈالر نا جرمانہ عائد کننگا۔ اگہ دا جرمانہ ءِ نن تسونہ تو ننامچ آ زرمبادلہ اوڑا خڑچ مسکہ۔ تھراٹی دنیا ٹی کولانا غٹ آن بھلا کوڑی ساڑی ءِ۔ اینو تھر انا کولاآن بناکروک آ ڈٹ آتیان نن فائدہ ہرفنگ اُن۔ چندی کارٹل، سیاسی و ایلو سوب آتا سوب آن نن مستین اٹ داوسیلہ غاتیان فائدہ ہرفنگ کتون۔
