اسلام آباد۔ 01 اگست (اے پی پی) حکومت پیٹرولیم مصنوعات آتا نہاد آتیٹی ودکی کرینے، پیٹرول نا نہاد اٹی 19.95روپئی و ہائی اسپیڈ ڈیزل نا نہاد اٹی 19.90 روپئی فی لیٹر نا ودکی کننگانے، پوسکن آ نہاد آتا اطلاق دمدستی وڑاٹ مریک۔ سے شنبے نادے آ میڈیا تون گپ وتران اٹی وزیرخزانہ سینیٹر محمد اسحاق ڈار پارے کہ تدوک آ 15 دے تیٹی جہانی منڈی تیٹی پیٹرولیم مصنوعات آتا نہاد آتیٹی بھاز زیات ودکی مس، جہانی مارکیٹ اٹی ہائی اسپیڈ ڈیزل نا نہاد 16 جولائی آ 96.26ڈالر آن ودسا 31 جولائی آ 111.46ڈالر فی بیرل مس، ہندا وڑ خام تیل انا نہاد 16 جولائی آ 89.14ڈالر فی بیرل ئسک ہرا 31 جولائی آ 97.39 ڈالر فی بیرل مس۔ وزیرخزانہ پارے کہ درو پیٹرولیم مصنوعات آتا نہادآتا پڑو مروئی ئسک ولے داٹی تاخیر داخاطران مس کہ نن نن نیمہ اسکان اوگراتون کاریم کرسا کرین و ننا کوشست ئس کہ پیٹرولیم مصنوعات آتا نہاد آتیٹی اگہ کمتی کننگ مرے تو اودے کننگے، اینو سہب انا نن وزیراعظم محمد شہباز شریف تون ہم دا باندات آ گپ وتران کرین، وزیراعظم ہم پارے کہ الس ءِ ریلیف تننگ کن انتس کہ کننگ مرے اودے کننگے۔ وزیرخزانہ پارے کہ مچ آ قوم ءِ سماءِ کہ آئی ایم ایف تون ہراپروگرام آ اتفاق مسنے و اگہ اومتوکہ تو او دروشم اٹ حکومت پیٹرولیم ڈویلپمنٹ لیوی نا مد اٹی کمتی کرسا جہانی منڈی تیٹی نہاد آتیٹی ودکی نا بھاریم ءِ ہرفیکہ و ودکی نا کچ کم مسکہ۔ اوپارے کہ مستین نا حکومت آئی ایم ایف تون نئے بیرہ معاہدہ غان روگردانی کرے بلکن ہِننگ تون نہاد آتے کم کرے ہراڑان ملک ءِ مشکل حالیت آتون مون تروئی تما۔ وزیرخزانہ پارے کہ داحالیت آتا رداٹ و ملکی فائدہ ٹی فیصلہ کننگانے کہ نہاد آتیٹی کم آن کم ودکی کننگے۔ اوپارے کہ ہائی اسپیڈڈیزل نا نہاد اٹی 19.90 روپئی نا ودکی کننگانے اوکان پد ہائی اسپیڈ ڈیزل نا پوسکن آ نہاد 273.40 روپئی مسنے، ہندا وڑ پیرول نا نہاد اٹی 19.95 روپئی نا ودکی کننگانے و فی لیٹر پیٹرول نا پوسکن آ نہاد 272.95 روپئی مس۔ وزیرخزانہ پارے کہ حکومت نا است خواہی ئسک کہ الس ءِ اخس کہ ریلیف تننگ مرے، اوتننگے، نن ساڑی آ تُو تیٹی ڈیزل نا نہاد اٹی 30 روپئی اسکان نا ہم کمتی کریسن۔
